Грипот е инфекција на респираторниот тракт, односно на носот, грлото и белите дробови, предизвикана од вирус и е многу заразна. Генерално, грипот е најчест во постудените месеци од годината, а во продолжение на текстот дознајте се за симптомите и лекувањето на грипот кај децата.
Симптоми на грип
Симптомите на грип се слични на оние кои се јавуваат при настинка, но се поизразени. Генерално, првите симптоми се појавуваат околу два дена по контакт со вирусот на грип, а еве што тоа вклучува:
- Изненадна висока температура
- Треперење
- Главоболка
- Болка во мускулите
- Вртоглавица
- Губење на апетит
- Замор
- Кашлица
- Болки во грлото
- Течење на носот
- Мачнина или повраќање
- Малаксалост
- Болка во увото
- Дијареа
Поради грип, бебињата наеднаш можат да станат нервозни и плачливи и едноставно ви се чини дека „не се добро“, дека нешто им фали.
Причина за грип
Грипот го добил името по вирусот што го предизвикува – вирусот на грип. Се пренесува по капков пат при кашлање и кивање, поради што овие контаминирани капки остануваат во воздухот, а други ги вдишуваат. Капки може да има и на површини како кваки и слично.
Грипот е многу заразен, може да се пренесе и еден ден пред да се појават симптомите, а заразноста трае онолку колку што траат симптомите – што е околу една недела кај возрасните, а кај децата може да трае и подолго.
Епидемии на грип главно се јавуваат секоја година, само што понекогаш се поизразени, односно бројот на заболени е поголем, а во други години се нешто поблаги.
Дијагноза и лекување на грип
Имајќи предвид дека симптомите на грип се слични како кај некои други инфекции, па ако на лекарот му е потребно да биде сигурен дали е во прашање грип, може да се направи тест со брис од грло или нос, пишува kidshealth.org.
Во повеќето случаи, децата можат да го преболат грипот дома, а еве што може да помогне:
- Доволен внес на течности за да се спречи дехидрација
- Доволно сон и одмор
- Сируп или лекови против болки и намалување на температурата – бруфен, ибупрофен, парацетамол
- Носење слоевита облека бидејќи на децата поради грипот, може да им биде ладно во еден момент, а во другиот жешко.
Децата заболени од грип не треба да одат на училиште или во градинка додека не бидат без температура најмалку 24 часа, без да користат лекови за намалување на температурата. Понекогаш е потребно подолго да останат дома, но за ова најдобро е да се консултирате со лекар.
Понекогаш лекарот ќе препише и антивирусни лекови, ако ситуацијата е посериозна или ако постои ризик од развој на некои посериозни симптоми.
Можни компликации
Понекогаш грипот може да предизвика некои компликации, а факторите на ризик се нешто поголеми кај:
- Деца на возраст под пет години, особено бебиња
- Кај оние кои имаат ослабен имун систем
- Кај деца кои имаат хронични здравствени состојби како што се астма или дијабетес
- Кај деца и тинејџери кои редовно пијат аспирин
Кај нив вирусот на грип може да предизвика посериозни симптоми, но и да доведе до пневмонија, а во некои случаи се јавуваат и секундарни инфекции (како бактериски инфекции). Во овој случај, потребно е болничко лекување.
Превенција на грип
Секогаш е подобро да се спречи отколку да се лечи, иако не постои ништо што може 100% да ги заштити децата од грип. Вакцината против грип може да помогне, но препорачливо е да се консултирате со вашиот педијатар.
Секако, она што секогаш помага е редовно миење на рацете и избегнување контакт со болни.
