Грипот кај децата, особено кај новороденчињата, има малку поинакви симптоми од грипот кај возрасните, но се третира на сличен начин. Кога грипот се лекува дома, најважен е одморот, доволниот внес на течности и лекови, чија количина мора да се прилагоди според возраста на детето и јачината на симптомите.
Грипот е респираторно заболување предизвикано од вирусот на инфлуенца кое се шири доста брзо.
Со оглед на тоа што овој вирус се шири со капки, односно при кивање, дување нос, кашлање и слично, групата која има најголеми шанси да се зарази се децата.
Имено, децата најмалку внимаваат на тоа да ги покријат устата и носот кога киваат или кашлаат, често допираат површини кои содржат вируси и бактерии и ги ставаат рацете во уста, го допираат лицето и слично.
Како да препознаете грип кај децата?
Иако симптомите на грип кај децата се слични на симптомите на настинка, сепак грипот е многу посилна болест, па децата, за разлика од тоа кога се настинати, генерално нема да имаат енергија за игра и ќе им биде потребен одмор.
Побарајте лекарска помош ако вашето дете има потешкотии со дишењето додека одмора или чувствува болка во градите кога дише, ако повраќа подолго од четири часа или често има дијареја
Симптомите на грип вклучуваат:
- ненадејна треска,
- главоболка,
- болки во мускулите,
- силен замор,
- кашлица и болки во грлото,
- затнат нос.
Покрај горенаведените симптоми кои се појавуваат и кај возрасните, грипот кај децата ќе се манифестира и преку некои од овие проблеми:
- нагло зголемување на температурата без никакви други симптоми кај новороденчиња;
- температура повисока од 39,5 степени и конвулзии кај многу мали деца;
- ларингитис, бронхиолитис и пневмонија;
- болки во стомакот, повраќање, дијареја.
Симптомите како што се треската и стомачните проблеми обично исчезнуваат во рок од два или три дена, но заморот, кашлицата и болките во мускулите може да траат и до две недели.
Лекување на грип дома
Со оглед на тоа дека симптомите на грипот се прилично силни и непријатни, за да му олесните на детето и да го забрзате процесот на заздравување, треба да го поттикнете што повеќе да одмора и доколку има температура, да го облечете во лесна облека и да ја одржувате собата умерено топла.
Иако симптомите на грип кај децата се слични на симптомите на настинка, сепак грипот е многу посилна болест, па децата, за разлика од тоа кога се настинати, генерално нема да имаат енергија за игра и ќе им биде потребен одмор
Исто така, давајте му на детето често, но во помали количини течности како супа, вода и чај за да не дехидрира. Исто така, важно е да му понудите храна како варено месо, ориз и слична храна која благотворно делува на желудникот – во помали количини, но почесто.
Доколку детето подолго време има висока температура и се жали на болки во мускулите, по препорака на лекарот можете да му дадете ибупрофен или парацетамол. Исто така, важно е да се навлажнува воздухот во просторијата за да му се олесни дишењето.
Кога да се обратите на лекар?
Како и секоја болест, и грипот може да доведе до бројни компликации, особено ако се работи за новороденчиња или многу мали деца. Затоа, во одредени ситуации неопходно е да се посети лекар.
Побарајте лекарска помош ако вашето дете има потешкотии со дишењето додека одмора или чувствува болка во градите кога дише, ако повраќа подолго од четири часа или често има дијареја.
Исто така, опасен симптом е кога детето пие многу малку течност и не мокрело повеќе од шест часа додека било будно. Треба да посетите лекар ако детето не се чувствува подобро по пет дена или набрзо почнува да има нови симптоми, ако не може да се разбуди и станува летаргично или ако делува невообичаено збунето и екстремно поспано.
