Родителите со причина се „плашат“ од ‘растечените’ другари на своето дете. Мајките и татковците главно “полудуваат“ затоа што некои родители ги испраќаат децата во градинка или училиште кога им тече носот, но факт е дека не е секогаш лесно да се знае кога се работи за заразна инфекција, а кога не.
Понекогаш зад течење на носот се крие алергиски ринитис, кој секако не е заразен, но во некои случаи може да биде во прашање заразна инфекција. Педијатарот д-р Дарија Маркова открива во кои два случаи течењето на носот е заразно и детето не треба да оди во колектив.
Прва причина
Течење на носот може да биде само еден симптом на болест, а ако се работи за настинка во рана фаза, тогаш детето лесно може да зарази други. Понекогаш течењето на носот може да се појави пред други симптоми на респираторни инфекции. Ако е придружено со покачена температура треска, тогаш вирусот е веќе присутен во крвта и секретите (плунка или секрет од нос) и детето е заразно.
Детето може да кивне и дури и да ја покрие устата со рака, но ако потоа не ги измие рацете, туку допре разни работи – кваки, играчки што ги дели со други, вирусот лесно ќе се пренесе, објаснува педијатарот.
Освен тоа, децата во градинките и училиштата се во близок контакт, се гушкаат, понекогаш ненамерно пијат од иста чаша како некој друг, а помладите може дури и да ја лижат играчката или рацете со кои ја допираат играчката… За да го намалите ризикот од инфекција, она што можете да направите е да го научите вашето дете почесто да ги мие рацете и да кива во свитканиот лакт, како и да не ги става рацете во уста.
Исто така, ако детето е доволно големо да може тоа да го разбере, научете го да не става играчки во уста и да не ги трие очите со валкани раце.
Втора причина
Друга ситуација во која течењето од носот е „знак за аларм“ т.е. е заразно е кога секретот е проѕирен и се појавува во млазови. Дури и кога нема температура или други симптоми, би било добро детето да остане дома неколку дена.
Покрај тоа што на детето не би му било пријатно надвор од дома затоа што му е потребно да лежи и да става капки во носот, доколку на детето многу му тече носот, постојат шанси понекогаш да го избрише со раце, што може да биде проследено со кивање и кашлање доколку секрет доспее во грлото.
Во оваа ситуација, детето лесно може да зарази други бидејќи течењето на носот всушност може да биде заразно и без температура, нагласува д-р Маркова.
Кога не треба да се грижите
Доколку течењето од нос е поврзано со сезонски алергии, немате причина за загриженост во смисла на пренесување на инфекцијата. Освен тоа, педијатарот нагласува дека течење на носот без температура или други симптоми не мора да значи ништо и може да биде знак дека детето се прилагодува на нова средина.
