Сезона е на вируси, а според педијатрите во моментов има деца и со заушки, стомачни вируси, рино и аденовируси, сипаници и други состојби кои предизвикуваат афти кај децата.
Што се афти
Афтите се мали ранички кои се појавуваат во внатрешноста на образите и усните, на дното на непцата и на или под јазикот. Поради овие рани, може да биде болно за децата да јадат, да пијат вода или да ги мијат забите.
Афтите се разликуваат од херпесот (пликови, покачена температура), кои се предизвикани од вирус и се наоѓаат надвор од устата, односно околу усните, на образите или брадата или внатре во ноздрите. Херпесот е заразен, но афтите не се.
Како да препознаете афти
Афтите обично се појавуваат како кружни, болни, отворени рани кои имаат бела или жолтеникава обвивка и црвен „прстен“ околу нив. Тие се главно мали (околу шест милиметри во дијаметар) и плитки, но можат да бидат подлабоки и поголеми.
Најчесто афтите се појавуваат спорадично, но можат да се појават и во мали групи. Понекогаш се случува децата да почувствуваат пецкање на одреден дел од слузокожата пред да се појават афтите.
Главно, афтите исчезнуваат за околу две недели, а во тој период може да бидат доста болни, особено првите три или четири дена откако ќе се појават. Освен во ретки случаи кога се многу големи или длабоки, рани обично не оставаат лузни, пишува kidshealth.org.
Причини за афти
Не е познато точно што ги предизвикува афтите, кои се нарекуваат и афтозни чиреви. Она што е познато е дека некои фактори придонесуваат за појава на афти, а еден од нив е исхраната. На пример, почесто се појавуваат кај оние чија исхрана не содржи доволно фолна киселина, витамин Б12 и железо, како и кај оние кои имаат некои алергии на храна.
Повредите во устата (како гризење на внатрешноста на усната или дури и оштетување на чувствителната слузокожа во устата со четка за заби), исто така, предизвикуваат афти. Натриум лаурил сулфат, состојка во многу пасти за заби и средства за плакнење уста, исто така може да се поврзе со поголема веројатност за развој на афти, а понекогаш овие ранички може да бидат знак за проблеми со имуниот систем.
Како се лекуваат афтите?
Ако детето има афти кои траат подолго од две недели или не може да јаде или пие поради овие болни ранички, побарајте совет од педијатар. Исто така, задолжително консултирајте се со лекар ако афтите кај детето се појавуваат повеќе од два или три пати годишно.
Во повеќето случаи, афтите ќе исчезнат сами по себе за околу две недели, а на децата, во консултација со педијатар, може да им се дадат некои препарати против болки.
Доколку афтите не поминат за неколку недели, лекарот може да препише некои локални лекови, како што е специјално средство за плакнење на устата или некој лек кој ќе помогне во заздравувањето на раните.
