Експертите велат дека подготовката и едукацијата за тоа што да очекувате за време на породувањето и како тоа изгледа може да ви помогне да бидете подготвени, а со самото тоа и поопуштени и подобро да соработувате при самиот чин на породување.
Постојат три фази на породување, каде што првата вклучува отворање на грлото на матката и движење на бебето кон породилниот канал, во втората фаза се раѓа бебето, а третата фаза вклучува раѓање на плацентата.
ПРВА ФАЗА
Оваа почетна фаза на породување започнува кога грлото на матката омекнува и почнува да се отвора. Првата фаза завршува кога грлото на матката се отвора околу десет сантиметри.
Во раните фази на породувањето, грлото на матката се скратува и станува потенко, а овој процес може да трае со часови, дури и со денови, а некои жени може да не чувствуваат ништо. Некои доживуваат поблаги болки, но нема шема и контракциите се неправилни.
Во раните фази на породувањето, може да се појави:
- Црвеникав исцедок што може да укаже на паѓање на слузниот чеп
- Болка во долниот дел на грбот
- Болки како ментруални кои доаѓаат и поминуваат
- Дијареа
- Ненадејно или бавно истекување на течност од вагината за време на пукање на водењакот (плодовата вода би требало да биде проѕирна или светло розова, други бои може да укажуваат на проблеми)
- Нагон за повраќање (жените често повраќаат за време на породувањето)
Во раните фази телото се подготвува за породување, а советот е да се остане дома додека контракциите не станат поредовни, да се грицне нешто за да имате енергија и да одморате. Исто така, редовно одете во тоалет и празнете ги цревата ако можете, т.е имате потреба.
Како што завршува првата фаза од породувањето, веројатно ќе станете малку вознемирени и уморни, а болката ќе стане поинтензивна. Болките, односно контракциите се јавуваат во бранови, така што се јавуваат поблаги болки кои постепено се зголемуваат, а потоа се намалуваат. Како што се приближува втората фаза од породувањето, времето помеѓу контракциите станува се пократко, а кога контракциите се јавуваат на околу пет минути, време е да се оди во породилиште.
ВТОРА ФАЗА
Втората фаза на породување се одвива кога грлото на матката е целосно отворено и бебето е подготвено да дојде на овој свет.
Оваа фаза на породување се карактеризира со:
- Подолги и посилни контракции, со минута или две растојание помеѓу
- Зголемен притисок во задникот
- Желбата и потребата за туркање
- Треперење, гадење и повраќање
- Интензивно чувство на печење или болка во вагината
Што можете да направите во оваа фаза на породување:
- Концентрирајте се на контракциите и одморете се помеѓу нив
- Обидете се да се опуштите и да му дозволите на вашето тело да го направи она што треба да го направи
- Пијте вода и одморете се колку што можете
- Слушајте ги упатствата дадени од акушерките и лекарите.
Потребата за туркање во некои фази може да биде навистина голема, а колку ќе трае оваа фаза зависи од жената – може да трае и до два часа, а обично трае помалку за оние кои веќе родиле.
ТРЕТА ФАЗА
Кога ќе стигнете до оваа фаза на породувањето, тоа значи дека веќе го држите вашето бебе во раце и сега сè е малку полесно! По раѓањето на бебето започнува оваа фаза на раѓање на постелката, во која веројатно ќе почувствувате:
- Уште контракции кои се важни за исфрлање на плацентата
- Чувство како да ви е полна вагината
Породувањето секако е интензивно искуство, но кога знаете што да очекувате во која фаза, може да биде малку полесно. Секако, на крајот најважно е се да помине добро и конечно да уживате држејќи го вашето мало чудо во раце.
