За да му обезбедите здрав емоционален развој на вашето дете, важно е да работите на сопствената емоционална стабилност и притоа да ги намалите периодите во кои сте нерасположени повеќето денови во неделата. Се разбира, животот не е бајка, тој се состои од предизвици, тешки моменти и понекогаш навидум нерешливи проблеми, но вашите деца и тоа како ја чувствуваат вашата нервоза, вознемиреност, лутина, агресија и безнадежност.
Нервозните родители растат несигурни деца
Ако раздразливоста или нервозата често се повторуваат, а родителот тоа го изразува со викање на партнерот и децата, кај детето се јавува чувство на несигурност и длабока вина.
Децата од раѓање до 3 години се особено чувствителни на емоционалната нестабилност на нивните родители. Меѓутоа, тоа не значи дека постарите деца тоа подобро го поднесуваат.
Исклучително е важно да бидете свесни и да го контролирате сопственото однесување околу децата во секој момент. Оваа препорака не е од корист само за менталното здравје на возрасните, туку и на остатокот од семејството.
Постојат многу фактори кои можат да предизвикаат лошо расположение – стресот, предизвикан од работата, финансиските проблеми го прават своето, а вовлечени во кругот на таквото секојдневие, викањето на децата и луѓето околу вас станува дел од вашиот модел на однесување.
Обидете се да станете свесни за таквите обрасци и да најдете активности кои ви овозможуваат да ја ослободите негативната енергија. Важно е да го идентификувате проблемот и да направите се што можете за да го решите. Можеби нема да можете да ги промените околностите во кои се наоѓате во моментов, но можете да ја промените вашата перспектива и да станете свесни за фактот дека од тоа зависи идната среќа на вашите деца.
Како лошото расположение на родителите влијае на децата?
- Развивање на чувство на несигурност и вина
- Депресија и анксиозност
- Потешко прилагодување во градинка и училиште и потешкотии во односите со врсниците
- Развивање агресивно однесување
3 чекори до решавање на проблемот
- Признајте го проблемот: Ако не признаете дека има проблем, никогаш нема да најдете решение. Единствениот начин да се соочите со проблемот и да направите промена е прво да препознаете дека нешто треба да се промени.
- Одвојте време за себе: Една од главните препораки на психолозите за одржување на оптимално емоционално здравје е да одвоите време за себе. Одвојте еден час за вежбање, читање или дружење со пријателите. Сето ова се добри начини да се ослободите од насобраниот стрес.
- Поработете на комуникацијата: Ефикасен начин за избегнување на стресни ситуации е да одржувате отворена и искрена комуникација со блиските луѓе. Важно е да му објасните на детето дека вашето расположение не е поврзано со него на кој било начин.
