Научникот д-р Пилјанг Ким од Универзитетот Денвер открил дека мажите по раѓањето на детето доживуваат слични промени во мозокот како и мајките. Деловите во мозокот одговорни за поврзаност, грижа, емпатија и способност за препознавање на детските барања, имале повеќе сива и бела маса веќе од 12 до 16 недела по раѓањето на детето.
Тој во своето истражување со магнетна резонанца тестирал 16 нови татковци, прво помеѓу втората и четвртата недела од раѓањето на бебето и потоа помеѓу 12 и 16 недела. Д-р Ким верува дека тие промени се исклучително важни за поврзување на таткото со детето и за совладување на родителството, оти тоа им овозможува побрзо да учат и да ги прифатат сите нови информации поврзани со бебето.
Но, на мажите и жените сепак најмногу им се активираат различни делови на мозокот. Кај жените најактивни се деловите одговорни за грижа, одгледување и детектирање опасности, додека кај мажите најмногу се активираат деловите одговорни за мисли, постогнување цели, планирање и решавање проблеми.
Тие различни делови на мозокот кои се активираат одговараат и за различните улоги кои ги имаат мајката и таткото.
Истражувањата покажале и дека мажите и жените добиваат различни невролошки награди за одредени родителски однесувања. Така, жените произведувале најмногу хормон на љубов – окситоцин додека се занимавале со воспитување, а мажите кога играле и се забавувале со децата.
