По раѓањето, стапалото на бебето често е благо свртено нанадвор, што е резултат на положбата на нозете во утробата. Во текот на првата година од животот, односно додека детето не почне да стои и да оди, од страна на табаните не се забележува внатрешниот свод на стапалото.
Дури по исправањето и првите чекори започнува постепеното формирање на сводот.
Во првата година
Во почетокот на проодувањето, детето оди со малку раширени нозе за полесно да ја одржи рамнотежата. Често се забележува и благо потпирање на внатрешната страна на стапалото. Поради присуството на масно перниче на табанот, стапалото изгледа рамно. Со текот на времето и со повеќе стоење и одење, постепено започнува формирањето на внатрешниот свод, кој прво може да се забележи додека детето седи или лежи. Кога стои, сводот сè уште не е јасно видлив.
Од втората година
По втората година, внатрешниот свод на стапалото може да се забележи и додека детето стои. Во овој период петата се наоѓа во неутрална положба и е во линија со коската на потколеницата кога се гледа од задната страна.
Од третата година
Околу третата година од животот, внатрешниот свод на стапалото е веќе развиен и може да се забележи и во седечка и во стоечка положба. Надворешниот свод, пак, сè уште не е целосно изразен. Петите остануваат во неутрална положба, а прстите се прави и поставени паралелно.
При стоење, тежината е рамномерно распределена по целата површина на стапалото. Ваквата структура на стапалото вообичаено останува слична сè до околу 20-тата година од животот, иако кај некои луѓе може да има одредени отстапувања.
