Секој родител се грижи кога е во прашање исхраната на бебето, а дилемата е особено присутна кога се работи за посолување на храната, односно за тоа колку сол е во ред да се вклучи во исхраната на детето. Иако на возрасните им е потребна, бебињата не треба да ја добиваат премногу, бидејќи бубрезите се уште им се развиваат и не се во состојба да обработат поголеми количини.
Зошто мора да ја ограничите количината на сол што му ја давате на вашето бебе?
Веројатно мислите дека солта ќе го подобри вкусот и ќе го поттикне бебето да ја изеде храната. Поради поголема количина на сол, може да настанат некои проблеми. Бубрезите на бебето се уште се незрели, така што не можат да го филтрираат вишокот сол, како што се случува со возрасните. Како резултат на тоа, може да настане оштетување на бубрезите и може да настанат некои долгорочни здравствени проблеми.
Децата се раѓаат со желба да јадат слатко, но и солено. Ако им даваме премногу солена храна, се менува и нивниот вкус, што подоцна води до тоа децата да одбиваат помалку солена храна. Тогаш ќе се зголеми потребата за преработена храна, која содржи поголема количина сол, а многу малку квалитетни состојки. Подоцна во животот, ова доведува до висок крвен притисок, а потоа и до поголем ризик од кардиоваскуларни заболувања.
Колку сол можете да му дадете на детето?
Натриумот, основната состојка во солта, е многу важен за здравјето на луѓето. Ова важи и за бебињата, но во многу мали количини.
Бебињата помали од 6 месеци ја добиваат потребната количина на натриум преку мајчино млеко или млечната формула.
Бебињата од 7 до 12 месеци добиваат натриум од мајчиното млеко или формулата и природно од храната.
Стручњаците не препорачуваат да воведете сол во исхраната во првата година од животот на детето. Во храната што ја подготвувате за детскиот оброк не додавајте сол.
Кога се во прашање деца над една година, препораките се различни. Додека некои стручњаци сметаат дека половина лажичка сол дневно е максимумот, некои препорачуваат и помалку.
Како да ја ограничите количината на сол во бебешката исхрана?
Многу кашички природно содржат одредена количина на натриум. Ако сами подготвувате храна за бебето, можете да бидете мирни – тешко дека ќе внесе премногу сол.
Најважниот совет е, се разбира, да не додавате сол во храната што ја подготвувате за вашето дете. Ако користите грав, пченка, грашок и сличен конзервиран зеленчук, задолжително измијте го. Кога купувате храна за бебето, секогаш проверувајте колку сол има во неа, читајте ги декларациите.
