Вакцината Фајзер против КОВИД-19 била ефикасна 90,7 проценти во клиничките испитувања на деца од пет до 11 години, објави во петокот американската компанија.
Шеснаесет деца кои добиле плацебо заболеле од КОВИД-19, а само три кои биле вакцинирани, наведува Фајзер во документите доставени до Агенцијата за храна и лекови на САД (ФДА).
Главната цел на истражувањата во кои учествувале 2268 деца, не било мерење на ефикасноста на вакцината, туку се споредувал бројот на антитела кај вакцинираните деца во однос на возрасните лица.
На основа на овие резултати, Фајзер минатиот месец објави дека нивната вакцина покренува силен имунолошки одговор кај децата.
Надворешни експерти на ФДА треба да се состанат утре и да одлучат дали Агенцијата ќе препорача употреба на вакцините за оваа возрасна категорија.
Фајзер вакцината веќе е одобрена за деца од 12 години нагоре.
