Дневното спиење е важен дел од развојот на детето, но многу родители се збунети околу тоа кога и како треба да се намали. Дали е време да го укинете попладневниот одмор, или уште е потребен? Стручњаците објаснуваат како се менуваат навиките на спиење со возраста и зошто дневниот сон е важен за растот, развојот и здравјето на детето.
Можеби едвај чекате вашето дете да се откаже од дневното спиење, а можеби сте нервозни затоа што тоа значи дека ќе изгубите драгоцено време за себе. Како и да е, можеби се прашувате кога воопшто децата престануваат да преспиваат преку ден.
Педијатарот д-р Крупа Плејфорт за „Тудеј“ вели дека спиењето е клучно за сите, особено за децата кои растат и се развиваат.
„Се повеќе истражувања потврдуваат дека висококвалитетниот, конзистентен сон со соодветно времетраење му помага на телото да функционира. Имаме дури и студии кои покажуваат дека дневните дремки можат да им помогнат на децата од предучилишна возраст да научат и да запомнат информации“, објаснува таа. Спиењето е неопходно за раст, развој на мозокот, регулирање на расположението, закрепнување и имунолошка функција.
Распоредот за дневно преспивање варира во зависност од возраста.
„Помеѓу првата и втората година, повеќето деца преминуваат од два дневни одмори на еден. На децата на таа возраст им требаат помеѓу 11 и 14 часа сон во рок од 24 часа, што вклучува и дремки преку денот“, објаснува педијатарот.
„Исто така, нормално е да се забележи промена во шемите на спиење околу 2. и 3. година, но на повеќето деца под 3 години сè уште им е потребна попладневна дремка“, додава таа.
Според Плејфорт, „децата на возраст од 3 до 4 години почнуваат да кокетираат со престанувањето на дневното спиење, но и понатаму им е потребен одмор за да го поминат остатокот од денот полесно“.
„Ако вашето тригодишно дете сè уште спие преку ден, а спие добро навечер, нема потреба да го укинувате дневниот одмор. Запомнете дека децата на возраст од 3 до 5 години обично им требаат помеѓу 10 и 13 часа сон на ден“, додава таа.
Според анкетите, приближно 60% од четиригодишните деца имаат попладневен одмор, додека само мал дел од петгодишните сè уште спијат преку ден.
