Децата, особено малите, се многу зависни од своите родители. Заради нивната безбедност, природно се развива инстинктивна приврзаност со родителите, а доколку тие или други блиски, возрасни луѓе се недостапни, тоа може да резултира со психолошка траума.
Психологот Људмила Петрановскаја открива кога децата се подготвени да поминат неколку дена без своите родители.
Кратката разделба од родителите не е лоша, истакнува психологот и додава дека мама и тато секако мораат да одат на работа. Меѓутоа, подолгата разделба може да предизвика неврози кои ќе ги измачуваат дури и кога ќе пораснат.
Според неа, најранливи се бебињата и затоа не се препорачува раздвојување од нив, како и од децата до три години. Затоа, истакнува психологот, подобро е да го одложите патувањето без деца додека не пораснат малку.
Децата од предучилишна возраст веќе малку полесно ја поднесуваат разделбата од родителите, но им треба помош од возрасните. Можете да се разделите на кратко, но нека бидат, да речеме, под надзор на баба и дедо или други блиски луѓе.
Петгодишно дете може да помине една недела со баба и дедо додека мама и тато ги нема, но и тука треба мала помош. Психологот пред се ве советува убаво да се поздравите со детето, а не да одите додека тоа спие. Потоа, оставете му некои работи што му се допаѓаат и што ќе му помогнат, како омилени играчки. Разговорот на телефон или преку видео повик може да им помогне на постарите деца да ја издржат раздвоеноста, додека пак може да ги збуни помалите деца – го слушаат гласот на мама или тато, но тие не се тука. Добро е на вашето дете да му раскажете приказна пред спиење на телефон, но и да му кажете: „Сега не сум покрај тебе, но еве една приказна пред спиење, а наскоро ќе се вратам да ти раскажам и друга“, советува психологот Петрановскаја.
Децата на училишна возраст се веќе помалку ранливи кога станува збор за одвојување од нивните родители и тие можат да уживаат, на пример, во зимски или летен камп. Кратко патување во детски камп може да биде добра опција за детето да го „запознае“ разделувањето од родителите. Сепак, имајте на ум дека се е индивидуално и дека за тивко, резервирано, интровертно дете, дури и кратката разделба може да биде трауматична, порачува психологот Петрановскаја.
