Родителите често забележуваат разлики во висината помеѓу нивното дете и врсниците, што може да предизвика загриженост дали детето расте доволно брзо. Ситуациите во кои помладото дете го надминува постарото често отвораат прашања за правилен развој, но важен чекор кон разбирање на растот и здравјето на детето се редовните систематски прегледи. Овие прегледи даваат вреден увид во напредокот на растот на детето и овозможуваат навремено откривање на какви било отстапувања. Со следење на растот може навреме да се откријат можни проблеми и да се обезбедат најдобри услови за здрав развој на детето.
Карта на раст како алатка за следење
Едноставните и лесно достапни графикони за раст, што ги користат педијатрите, овозможуваат бележење на податоците неопходни за следење на растот. Таму се внесуваат податоци како пол, датум на раѓање, телесна тежина и должина при раѓање, висина на родителите, како и последната измерена висина на детето со датумот на мерење. Како стандард за споредба служат картите на Светската здравствена организација, според кои може да се процени дали детето расте во согласност со очекувањата.
Посебно внимание треба да се посвети на растот на детето доколку висината не одговара на неговиот генетски потенцијал, ако детето престане да расте, заостанува по висина зад своите врсници или ако детето има проблем со обезноста. Во вакви ситуации се препорачува посета на педијатар кој може да ве упати на дополнителни анализи.
Терапијата со хормон за раст може да донесе промени
Факторите како што се генетиката, исхраната, спиењето, физичката активност и околината влијаат на растот, а одредени хронични состојби можат да го попречат. Во случаи кога постои сомневање за застој во растот, терапијата со хормон за раст може да обезбеди многу придобивки, вклучувајќи зголемување на густината на коските, подобра мускулна маса и намалено масно ткиво. Хормонот за раст има и когнитивни придобивки, како што се подобро внимание, помнење и јазични вештини.
Терапијата за низок раст е комплексна затоа што опфаќа голем број на различни причини за заостанување во растот. Во повеќето случаи, со лекување на основната болест која влијаела на растот, растот се оптимизира (целијачна болест, хронични инфекции, рахитис, анемија…). Кај различни ендокринопатии, хормонската заместителна терапија најчесто целосно го овозможува феноменот на брза компензација во растот и постигнување на посакуваната крајна висина.
Да ги поддржиме децата во нивниот развој
Ниската висина кај децата може да ги направи ранливи и да влијае на социјалната изолација или дискриминација. Раното препознавање и лекување на проблемите со растот дава најдобри резултати, особено кога терапијата се започнува пред пубертетот. На овој начин, на детето му се дава најдобра шанса да достигне задоволителна висина во зрелоста. Сепак, важно е да се има предвид дека секое дете расте со свое темпо и дека споредувањето со врсниците не е секогаш корисно.
Покрај тоа, важно е да се запамети дека секое дете расте и се развива уникатно, така што споредбата со другите не е секогаш корисна.
Истражувањата покажуваат дека повеќе од 90% од децата со пониска висина, се целосно здрави. Растот е еден од клучните аспекти на развојот на детето и се одвива под влијание на комбинација на генетски и надворешни фактори – и секогаш во свој, единствен ритам.
