Родителите даваат се од себе да се грижат за своите наследници што е можно подобро, во секоја сфера од животот. Сепак, постојат и многу контрадикторни совети, особено денес кога во онлајн светот секој може да сподели совет, па дури и некој кој воопшто не е стручен.
Поради тоа, болничарот од Брза помош, Џејмс Мекнолти-Акројд одлучи да стави крај на нестручните совети и да ги предупреди родителите за некои намирници кои претставуваат висок ризик од гушење кај малите деца.
„Родителите треба да бидат внимателни кога се во прашање некои избори поврзани со храната. Малите намирници како грозје, боровинки, шери домати, јаткасти плодови, гуми за џвакање, сурови моркови и желе бонбони не треба да им се даваат на мали деца“, вели Мекнолти-Акројд и додава: „Главниот ризик од гушење доаѓа од фактот што овие намирници се тркалезни, тврди или лизгави, што им отежнува на децата да ги џвакаат и го зголемува ризикот од гушење“.
Болничарот наведува и уште една опасност – пуканките, кои иако ги немаат овие наведени својства поради кои би биле опасни, всушност тоа се бидејќи се лесни и постои голем ризик детето да ги вдише и да дојде до аспирација.
Дури и со намирници кои не се на оваа листа, важно е да бидете внимателни и на правилен начин да ги подготвите и исечкате за детето.
„Би препорачал да се мијат и лупат овошјето и зеленчукот, особено оние со тврда кора како јаболка, грозје и моркови“, вели Мекнолти-Акројд.
За да го намалите ризикот од гушење при хранење, болничарот препорачува да:
- Секогаш го надгледувате детето, особено кога нешто пие или јаде. Децата треба да седат, по можност на маса, додека јадат – многу е поголем ризикот од гушење ако детето оди или трча наоколу со парче храна во устата.
- Кога детето ќе почне да јаде цврста храна, погрижете се текстурата и густината да се соодветни за возраста на детето и неговата развојна фаза.
- Секогаш исечете ја храната на парчиња кои детето може безбедно да ги изџвака и проголта. Суровите моркови и јаболка изрендајте му ги на детето и така понудете му ги или исечкајте ги на тенки стапчиња.
- Грозјето, шери доматите и храната со слична форма исечкајте ја на четвртини или помали парчиња, во спротивно може целосно да ги блокира дишните патишта на детето и да доведе до задушување.
- Излупете ги колбасите ако му давате на дете и исечете ги по должина на помали парчиња (со големина на ноктот од малиот прст на вашето дете).
- Кога на детето му нудите намаз, нанесете го само во тенок слој на лебот.
