Вашето дете може да има различни симптоми за време на инфекција на уво. Разговарајте со вашиот педијатар за најдобриот начин на третман на симптомите на вашето дете.
БОЛКА. Најчестиот симптом на инфекција на уво е болката. Поголемите деца можат да ви кажат дека ги боли увото, додека помалите може само да бидат раздразливи и да плачат. Ова најчесто се забележува при хранење, бидејќи цицањето и голтањето можат да предизвикаат промена на притисокот во средното уво, што е болно.
ГУБЕЊЕ НА АПЕТИТ. Вашето дете може да јаде помалку поради болката во увото.
За потврда на инфекцијата потребен е преглед на тапанчето и утврдување на наталожена течност и знаци на воспаление
ТЕШКОТИИ ПРИ СПИЕЊЕ. Болката може да му отежне на вашето дете да заспие или да спие мирно.
ТРЕСКА. Вашето дете може да има покачена температура – од 37,7°C до 40°C.
ИСЦЕДОК ОД УВОТО. Може да забележите жолта или бела течност, можеби со траги од крв, која истекува од увото на вашето дете. Течноста може да има непријатен мирис и да изгледа поинаку од нормалната ушна маст (која е портокалово-жолта или црвено-кафеава). Болката и притисокот обично се намалуваат откако ќе започне истекувањето, но тоа не значи секогаш дека инфекцијата се повлекува. Ако се случи ова, не е итна состојба, но потребно е детето да го прегледа педијатар.
ПОТЕШКОТИИ СО СЛУХОТ. За време и по инфекцијата на уво, вашето дете може да има потешкотии со слухот неколку недели. Ова се случува бидејќи течноста зад тапанчето го попречува преносот на звуците. Ова е обично привремено и се подобрува кога течноста ќе се исцеди.
Важно:
Вашиот доктор не може да постави дијагноза за инфекција на уво преку телефон. За потврда на инфекцијата потребен е преглед на тапанчето и утврдување на наталожена течност и знаци на воспаление.
ДРУГИ ПРИЧИНИ ЗА БОЛКА ВО УВО
Покрај инфекцијата, постојат и други причини поради кои увото на вашето дете може да боли:
- Инфекција на кожата на ушниот канал, често наречена „пливачко уво“.
- Намален притисок во средното уво поради настинки или алергии.
- Воспалено грло.
- Никнување заби или воспалени непца.
- Воспаление на тапанчето без акумулирана течност, често во текот на настинка. (ААП)
