На родителите може да им се пристори дека децата се постојано во движење, и кога се домот, но стручњаците велат дека повеќето денешни деца премалку се движат, а се повеќе време поминуваат во количка (додека се помали) и кога се дома се постојано пред екрани, што доведува до послаби моторички способности, но и до креирање на нездрави навики, што се пренесува подоцна во животот.
На децата секојдневно треба да им се обезбеди од 1 до 4 часа активност. Колку е детето постаро, и активностите треба да бидат поинтензивни и да траат подолго време. За помладите деца, почнувајќи од 2 години, секоја игра надвор е активност, како трчање, па како растат, активностите треба да се интензивираат како скокање, пливање или возење велосипед.
Играта на отворено не е само добра за нивното тело, туку и за развој на мозокот. Студии покажале дека играта на отворено помага за подобар развој и когнитиввни вештини кај децата. Моторичките вештини се стекнуваат со активности како што се ползење, трчање, скокање, качување, провлекување, фрлање, удирање топка, балансирање, додека говорните и когнитивните се поттикнуваат со развивање на фантазијата, глумење, сложувалки, бројалици. Одлични се игрите кои спојуваат бројалици и физички движења, прескокнување на јаже и сл. Дополнително, со секоја игра, кога детето постигнува успеси, совладува, му се развива и самодовербата.
Физичката активност кај децата им помага за подобар развој и на фините и грубите моторички вештини, а креира и добри темели за здрави навики со кои децата се носат подоцна во животот.
Активностите треба да се поделат на неструктурирани и структурирани. Неструктурирани игри се дел од секојдневните детски игри, лулашки, нишалки… додека структурираните вклучуваат едноставни спортови. Со структурирани активности детето би требало да се занимава најмалку половина час дневно.
