Важно е децата да поминуваат време надвор бидејќи престојот во природа има значително влијание врз нивниот развој. Во тоа, меѓу другото, важна улога има и витаминот Д, кој се внесува преку некои намирници, но и со престој на сонце.
Меѓутоа, престојот на сонце треба да биде временски ограничен, особено кога станува збор за многу мали деца и денови кога е навистина топло, односно кога сончевото зрачење е силно.
“Сончевите зраци, поточно УВ зрачењето кое го емитува Сонцето, се важни за развојот на коските кај децата. Здравите коски се предуслов за правилно држење и одење. При раѓањето, повеќето детски коски се состојат од ‘рскавица, а дури подоцна добиваат цврста структура. Правилната минерализација на коските се случува кога детето добива калциум и фосфат преку исхраната, а тие се вградуваат во ‘рскавичните коски под влијание на витаминот Д“, вели педијатарот проф. д-р Алфрен Ленглер.
Витаминот Д, истакнува тој, се произведува и во човечкото тело со помош на УВ зраците, поради што е важно децата да го поминуваат времето надвор. Сепак, премногу време надвор и кожата на детето може да изгори под влијание на сонце, поради што многу родители се во дилема колку време е доволно детето да биде надвор за да ја добие потребната количина на витамин Д.
„За да се обезбеди доволна количина на витамин Д во кожата, бебињата и малите деца треба да бидат изложени на сончевите зраци помеѓу 30 и 60 минути дневно. Доволно е нивното лице да биде изложено кога денот е ведар. Не е неопходно тие да бидат изложени на директна сончева светлина и, се разбира, треба да носат облека“, вели д-р Ленглер.
Тој истакнува дека прекумерното изложување на сонце може да има негативни последици, особено за малите деца чија кожа е тенка и нежна.
„Лесно можат да изгорат, односно кожата да им се зацрвени и да се појават плускавци. Изгорениците од сонце во детството го зголемуваат ризикот од развој на рак на кожата подоцна во животот“, истакнува педијатарот, наведувајќи неколку важни совети како да се избегне детето да изгори при престој на сонце.
Колку е помладо детето, толку е поважно да не поминува време надвор кога сонцето е најсилно, што обично е помеѓу 11 и 16 часот.
Кожата на детето секогаш треба да биде покриена со лесна, тенка памучна облека, а главата и вратот треба да бидат заштитени со капа.
Користете крема за сончање со најмалку заштитен фактор 20.
Нанесете крема за сончање особено нежно на надворешниот дел од ушите, носот и горниот дел од стапалата.
Дури и кога детето носи крема за сончање, тоа не значи дека треба да биде на директна сончева светлина долго време. Ако се случи да изгори и покрај сите мерки на претпазливост, најдобро е да побарате стручен совет за понатамошни чекори.
