Дефинитивно не сакате на вашето дете да му биде ладно додека спие, но исто така не е добро ниту да го прегреете бидејќи тоа го зголемува ризикот од ненадејна смрт на доенчиња. Не е лесно да се одлучи колку е доволно да се покрие детето во зима затоа што родителите главно се плашат на децата да не им е студено. Затоа овој мал водич ќе ви биде корисен.
Кејт Холмс од хуманитарната организација The Lullaby Trust, која се занимава со безбедноста на децата, споделува шест совети кои ќе му помогнат на детето да не биде ниту ладно, ниту премногу топло навечер.
- Вреќа за спиење
Идеалната температура на детската соба е од 16 до 20 степени, па затоа се препорачува да имате термометар во просторијата каде што бебето спие. Користете лесна прекривка или лесна вреќа за спиење,а одоздола, по потреба додадете слоеви облека и тоа на следниов начин.
Ако во собата е 20 степени, доволна е потенка вреќа за спиење (1,0 TOG), под која на детето ќе му облечете боди без ракави плус еден тенок долг ракав. Ако вреќата има ознака 2,5 TOG, одоздола е доволно едно боди со долги ракави.
На температура пониска од 18 степени, под вреќа 2,5 TOG, облечете го детето во боди со долги ракави плус уште еден долг ракав, а ако температурата во просторијата е помала од 16 степени, доволна е вреќа од 3,5 TOG плус боди со долги ракави и маица со долги ракави или вреќа од 2,5 ТОГ со тенки пижами одоздола (долги ногавици и долги ракави).
На собна температура пониска од 14 степени, потребно е детето да носи вреќа за спиење од 3,5 TOG со пижами со долги ногавици и ракави одоздола.
Секако, доколку се користат вреќи за спиење, бебето не се покрива дополнително со ќебиња.
- Покривање
Кога станува збор за покривање, доколку користите потенки ќебиња, на собна температура од 18 степени, доволно е детето да го покриете со еден чаршаф и две ќебиња, доколку носи пижами со долги ракави и ногавици.
На температура од 16 степени во просторијата ќе ви треба уште едно дополнително ќебе, а на температура од 12 степени ќе ви треба еден чаршаф и четири или повеќе ќебиња.
- Проверете го вратот на бебето
За да бидете сигурни дека бебето ниту сте го претоплиле, ниту пак му е многу студено, пипнете го задниот дел од вратот или стомакот. „Доколку бебето е премногу жешко, кожата е малку испотена, треба да отстраните слој облека или прекривка“, препорачува Холмс.
- Никогаш не ставајте капа
Во никој случај не треба да му ставате капа на бебето додека спие во куќата, без разлика колку е студено, бидејќи голата глава е важна за ослободување на топлина и одржување на телесната температура.
- Не го засилувајте греењето
Кога надвор е навистина ладно, многу родители го оставаат парното вклучено цела ноќ, но тоа не е паметно.
“Куќата ќе биде премногу топла додека спиете. Ако го оставите парното греење цела ноќ, прилагодете ја температурата на не повеќе од 20 степени”, советува таа.
- Не го ставајте креветчето во близина на радијаторите
Исто така, колку и да е ладно, не го ставајте креветчето на бебето веднаш до радијаторот бидејќи освен што може да биде премногу топло, ризикувате бебетосо рачето да го допре жешкиот радијатор.
