Што вели науката? Одговорот е едноставен: колку сте поблиску до некој кој е заразен, толку е поголем ризикот од фаќање на вирусот
♦♦♦♦♦♦♦
Светската здравствена организација вели дека растојанието од 1 метар е безбедно. Некои земји ја усвоија оваа препорака, додека други, вклучително и Велика Британија, отидоа понатаму:
- Социјална дистанца од 1 метар: Кина, Данска, Франција, Хонг Конг, Литванија, Сингапур
- 1,4 метри: Јужна Кореја
- 1,5 метри: Австралија, Белгија, Германија, Грција, Италија, Холандија, Португалија
- 1,8 метри: САД
- 2 метри: Канада, Шпанија, Велика Британија
Не се работи само за растојанието
Тајмингот е исто така клучен. Колку подолго време минувате во близина на заразено лице, толку е поголем ризикот. Научниците кои ја советуваат владата на Велика Британија велат дека поминување шест секунди на растојание од 1 метар од некого е исто како да поминете една минута на растојание од 2 метри.
Да се биде изложен на нечие кашлање е поризично. Два метри оддалеченост од некој што кашла носи ист ризик како некој да разговара со вас 30 минути на исто растојание.
Инфекцијата полесно се пренесува во затворено отколку надвор на свеж воздух. Јапонските истражувачи испитувале 110 случаи на Ковид-19, следејќи ги контактите на заразените лица. Тие процениле дека шансите за пренесување на инфекција биле скоро 19 пати поголеми во затворен простор отколку надвор
Што велат истражувањата?
Во студијата објавена во медицинскиот журнал „The Lancet“, научниците ги оценуваа неодамнешните истражувања за начините на кои може да се шири коронавирусот. Тие заклучуваат дека одржувањето најмалку 1 метар растојание од другите луѓе може да биде најдобриот начин да се ограничат шансите за инфекција. Понатаму, ризикот од зараза се проценува на 13% во рок од 1 метар, но само 3% над тоа растојание. Студијата вели дека за секој дополнителен метар оддалеченост до 3 метри, ризикот дополнително се намалува за половина.
Од каде потекнува правилото за дистанцирање?
Може да се најде години наназад и води се до истражувањата од 1930-тите години. Научниците откриле дека капките течност ослободени од кашлање или кивање испаруваат брзо во воздухот или паѓаат на земја. Повеќето од овие капки, ќе слетаат на 1-2 метри.
Затоа се вели дека најголемите ризици за зараза со вирусот се некој да се искашла кон вас одблизу или да ја допрете површината врз која некој се искашлал, а потоа да го допрете лицето.
Може ли вирусот да патува и на други начини?
Многу научници ја сметаат близината и површинските контакти како главни патишта за пренесување. Но, некои истражувачи се загрижени дека коронавирусот исто така може да се транспортира низ воздухот во ситни честички наречени аеросоли.
Во тој случај, протокот на ветер од нечиј здив може да го однесе вирусот на подолги растојанија.
Професорката Лидија Буруиба од Институтот за технологија во Масачусетс (МИТ) користеше камери со голема брзина за да фати кашлица дури до 6 м. Студија, пак, спроведена во болниците во Кина, во која беа пронајдени траги од коронавирус во одделенијата за Ковид-19 и одделенијата за интензивна нега, проценува дека 4 метри е подобро безбедно растојание. За Американскиот центар за контрола и превенција на болести, улогата на аеросолите во ширењето на вирусот е „моментално неизвесна“.
Што уште прави разлика?
Постои широк договор дека инфекцијата полесно се пренесува во затворено отколку надвор на свеж воздух. Јапонските истражувачи испитувале 110 случаи на Ковид-19, следејќи ги контактите на заразените лица. Тие процениле дека шансите за пренесување на инфекција биле скоро 19 пати поголеми во затворен простор отколку надвор. (Би-би-си)
