Според новата студија во која се опфатени податоци за 3,5 милиони луѓе кои биле заразени со коронавирус, вакцинацијата не само што ќе помогне да се заштитите од болеста Ковид-19, туку исто така ќе помогне и да ги заштитите сите околу вас – и оние кои сè уште не се вакцинирани.
Ова е добра вест за родителите кои се вакцинирани додека нивните деца сè уште немаат можност за тоа. „Студијата го потврдува она во кое и верувавме“, изјави д-р Амит Кумар, експерт за вакцини. Тој објасни дека иако децата се помалку подложни на развој на симптоматска инфекција кога се изложени на вирусот, и понатаму можат да го пренесуваат без да имаат симптоми. Меѓутоа, доколку се вакцинираат оние кои се околу нив, децата нема да можат да бидат изложени на вирусот, а со самото тоа и нема да можат да го пренесуваат.
Вакцинацијата не само што ќе помогне да се заштитите од болеста Ковид-19, туку исто така ќе помогне и да ги заштитите сите околу вас – и оние кои сè уште не се вакцинирани
Научниците заклучиле дека колку што има повеќе вакцинирани лица, толку е помал бројот на оние кои се позитивни на болеста, а не се вакцинирани.
Добрата вест е дека вакцината може да спречи ширење на вирусот кај невакцинирана популација, но важно е да се знае дека ова се резултати од само една студија. „Иако вакцината ќе го намали ширењето на болеста, важно е да се знае дека сè уште има голем број на вируси во оптек и дека има деца кои сакаат да се дружат со други деца и така можат да го шират вирусот“, додаде д-р Сара Браун, инфектолог.
Кога ќе се вакцинираат децата?
Кумар смета дека тоа е само прашање на време. Кога вакцините ќе бидат безбедни и за децата. Вакцината Фајзер е веќе одобрена за употреба кај лица над 16 години, но од ФДА во моментов се бара дозвола за вакцинирање на деца на возраст од 12 години.
„Некои клинички студии кај млади луѓе се веќе спроведени, а други секако се планираат“, додава Кумар, кој смета дека овие вакцини ќе се покажат безбедни и за децата. Тој верува дека дозволата за вакцинирање на децата ќе дојде наесен. Дотогаш, и децата и сите што не се вакцинирани мора да бидат претпазливи, да носат маски, да ги мијат рацете, да избегнуваат гужви.
„Сè уште постои голем скептицизам во однос на овие вакцини и вакцините воопшто“, рече Кумар. „Луѓето треба да разберат дека ако сакаат да бидат членови на општеството, тие треба да бидат вакцинирани не само за да се заштитат себеси, туку и за да ги заштитат другите членови на општеството“.
Луѓето кои тврдат дека тоа е личен избор, рече тој, треба да препознаат дека го прават изборот и за другите исто така.
„Вакцините се најголемите медицински алатки што ги разви човештвото за да се бори против моќните и смртоносни заразни болести“, вели Кумар. „Би било штета за луѓето да не ја искористат предноста на оваа технологија.” (Healthline)
