Истражувањето покажа дека расте имунитетот на SARS-CoV-2 кај австриското население, но сè уште не се знае во кој обем овој имунитет важи и за разни мутации на вирусот SARS-CoV-2 или колку долго и до кој степен трае заштитата од реинфекција во подолг временски период
Инфекцијата со коронавирус ја дава скоро истата заштита како и вакцината, покажало истражувањето на Медицинскиот факултет во Грац. Научниците дојдоа до резултат дека оние кои прележале коронавирус имаат 91 процент помал ризик од инфекција во следните седум месеци.
Истражувањето покажало дека нивото на имунитет на излекуваните е само малку пониско од она кое го предизвикува вакцината на „Фајзер“, чијашто ефикасност е 95%. Научниците заклучуваат дека инфекцијата со коронавирус предизвикува скоро исто ниво на заштита која ја имаат вакцинираните лица.
„Под лупа“ биле пациенти заразени во првиот бран на инфекција, од февруари до мај, кои биле следени во вториот, од септември до јануари. Во споредба со остатокот од населението во Австрија, тие имале значително посилна отпорност на инфекцијата, пишува „Вечерње новости“.
„Тоа значи дека расте имунитетот на SARS-CoV-2 кај австриското население, но сè уште не знаеме во кој обем овој имунитет важи и за разни мутации на вирусот SARS-CoV-2 или колку долго и до кој степен трае заштитата од реинфекција во подолг временски период“, се наведува во истражувањето.
Резултатите се слични на оние добиени од британските научници кои откриле дека скоро 90 проценти од заразените со коронавирус имаат антитела во своето тело шест месеци по инфекцијата. Податоците од февруари на најголемата британска биомедицинска база на податоци, UK Biobank, покажуваат дека 88 проценти од испитаниците имале антитела по шест месеци, додека по три месеци процентот бил 99 проценти.
Австриската студија е објавена во часописот „European Journal of Clinical Investigation“.
