Кога температурите ќе паднат, родителите почнуваат да се грижат и се помалку ги носат децата надвор на воздух. Родителската загриженост најчесто е поврзана со стравот од детски болести, па најчесто есеннските денови ги поминуваат во затворен простор пред телевизор или со таблет во рацете, а всушност треба да бидат надвор исто како и кога времето е топло. Постуденото време секако го ограничува времето на престој на воздух, но не треба да не ограничува во прошетките и игрите. За детето нема поубаво доживување од скокање по барички, тркалање во лисја и игри на снег. Играта на свеж воздух има огромна важност во поттикнување на целокупниот детски развој.
- Престојот на воздух го зајакнува детскиот имунитет
Доколку децата поминуваат повеќе време на свеж воздух, генерално ќе бидат поздрави бидејќи секојдневно се во контакт со разни бактерии, животни, земја и песок. Тоа е природен начин на функционирање на организмот во природата, па детето најверојатно ќе има поголема отпорност на автоимуни болести и алергии. Бактериите и вирусите се размножуваат на повисоки температури, додека ниските температури ги убиваат. Престојот надвор во тек на студено време ќе му овозможи на детето да внесе големи количини свеж воздух во своето тело. Овој свеж воздух поволно ќе влијае врз дишните патишта на детето, нервниот систем, а и крвотокот подобро ќе функционира.
- Престојот на воздух го зајакнува телото на детето и поттикнува моторен развој
Детето секогаш има потреба да се движи. Трчањето и скокањето низ станот и креветот често не е добра опција за справување со вишокот енергија, па затоа детето треба да се изнесе надвор да трча, да паѓа, да зсе лула, да се врти и да истражува. Кога ќе падне снег нека прави снежните топки, нека се санка и тркала во во снегот, бидејќи снегот и онака е создаден само за нив. Сите овие активности ќе придонесат за моторен развој и зајакнување на телото и мускулите, а со тоа ќе влијаат и на останатите полиња на развој.
- Престојот во воздух влијае на когнитивниот развој, фантазијата и креативноста
Не е доволно на детето само да му зборува за есен или зима и да му се покажуваат слики. Најдобар начин на учење е оној од сопствено искуство. Трчањето со ветерот, собирањето лисја, чкрипењето на снег, скокањето по барички кај детето создава голема радост и среќа. Учењето на причинско-последичните односи се случува веднаш, а детето има можност да ја набљудува природата и промените во неа на лице место.
- Децата облечете ги според временските услови
Само затоа што е ноември не значи дека детето треба да има хулахопки, термо џемпер, зимска јакна и волнен шал. Облечете го онака како што би се облекле себе си на одредена температура. Децата на воздух не се статични, тие трчаат, се вртат, скокаат, а при тоа телото им се загрева и се потат, а образите им поцрвенуваат. Дозволете им на децата да бидат деца, оставете ги да играат, да се забавуваат и да уживаат во секоја секунда од играта без разлика дали грее сонцето, врне дождили снег или можеби дува ветер.
