Распустот на децата се уште трае и засега нема најави за продолжување. Тоа значи дека во четврток, на 20 јануари децата треба да седнат во училишните клупи. Децата во градинките или училиштата почесто заболуваат од грип, бидејќи престојот во затворен простор каде има повеќе луѓе овозможува лесно пренесување на вирусот и затоа и е тешко да се превенира капкова инфекција. Пандемијата со КОВИД-19 и мерките кои се на сила за нејзинот спречување до одредена мера може да го намалат процентот на лица кои може да се инфицираат со вирусот на грип. Но, децата, кога е во прашање овој вирус се многу позаразни од возрасните и подолго го шират вирусот на грип, а и почесто се хоспитализираат поради оваа болест, отколку од други заразни болести и тоа најчесто на возраст до две години.
Педијатрите советуваат како да го препознаете грипот кај децата и како да ги заштитите.
ГРИПОТ СЕ РАЗВИВА ПОБРЗО
Грипот обично се развива многу побрзо од настинката и е проследен со многу висока температура. Детето е многу исцрпено, дезориентирано, има главоболка и болки во мускулите, што не е случај кај настинката. Настинката обично не предизвикува покачена температура и ако се појави, таа не е многу висока. Болеста го зафаќа само горниот респираторен систем, па знаците на заболувањето се поблаги и пократко траат. Водечки знак е секрецијата од нос и кашлица, а болки во мускулите и главоболки како кај грипот нема.
ТЕСТ ЗА ГРИП
Симптомите на грип може да варираат од дете до дете, така што, ако се посомневате дека се работи за грип, најдобро е да се јавите кај лекар. Стрептококното воспаление на грлото или воспаление на белите дробови со симптомите исто така може да наликува на грип или настинка. Лекарот може детето да го испрати на дополнителни анализи за да биде сигурен дека е во прашање вирус на грип. Тоа се прави со брз тест на брис од нос.
МИРУВАЊЕ И ДОВОЛНО ТЕЧНОСТИ
Ако детето заболи од грип, задолжително треба да мирува. Важно е да внесува доволно течности за да не дехидрира поради покачената телесна температура. Температурата, велат педијатрите, намалувајте со облоги и туширање и исклучиво со препарати за деца, со доза која ќе ја одреди лекарот.
ОПОРАВУВАЊЕТО ТРАЕ ДОЛГО
Вирусот на грип значајно го ослабува детскиот имунитет, па времето на опоравување трае околу еден месец, што е многу повеќе време од кај настинка. Мирувањето и поголемиот внес на течности се најважни за да грипот едноставно се преболи.
ЧЕТИРИ ВАЖНИ ПРАВИЛА: Како да спречите ширење на вирусот
- Носот на детето секогаш мора да биде прооден
Со физиолошки раствор или хипертоничен раствор на морска вода, еднаш до два пати дневно исчистете го носот и ќе обезбедите хигиена на носната шуплина и ќе превенирате инфекција на грлото, увото, но и на белите дробови.
- Мијте ги рацете со вода и сапун што е можно почесто
Често проветрувајте ги просториите во кои престојувате. Избегнувајте да ги носите децата во затворени места или места каде циркулираат голем број на луѓе, како што се шопинг центрите.
- Исхрана
Зајакнете го имуниот систем со здрава и балансирана исхрана со многу супи, овошје, зеленчук и варива. Тоа ќе му обезбеди витамини на организмот и ќе му помогне ефикасно да се бори против заразата. Престојувате на свеж воздух без оглед на студеното време.
КОГА ПОМАГА АНТИБИОТИК?
Кај инфлуенцата како и кај обичната настинка не се потребни антибиотици, вели педијатарот д-р Оскар Лучев. Тие доаѓаат предвид само кај компликации од заболувањето. Антибиотикот делува само на бактерии, а не на вируси кои се причина за настинка, грип, повеќето болки во грлото, воспаление на синусите и кашлица. Кашлицата и болката во грло по повеќето случаи се симптоми на вирусни инфекции и антибиотик не може да помогне во лекувањето, ниту во ублажување на симптомите. Антибиотикот помага само ако дошло до бактериска суперинфекција, а кај децата тоа најчесто е воспаление на средно уво или воспаление на бели дробови.
