За лененото семе веројатно сте слушнале многу, и за тоа колку бенефити носи за здравјето, особено поради содржината на омега-3. Иако е присутно лененото семе во исхраната на возрасните, многу родители не знаат кога може да го воведат во исхраната на бебето и поголемите деца, и како да го подготват и да им го дадат на најмладите. Ленот има позитивни здравствени својства и е добар извор на здрави масла, влакна и други есенцијални нутриенти кои се добри за здравјето, растот и развојот на бебето.
Има три есенцијални компоненти кои го прават моѓна хранлива намирница. Ленот изобилува со омега-3, односно алфа-линоленска киселина (АЛА), лигнин, влакна (растворливи и нерастворливи).
Кога бебето може да почне да јаде лен?
Најчесто препораките на педијатрите се дека ленот во исхраната на бебето може да почне да се дава околу 7-8 месец. Во идеален случај, ленот кај бебето може да се воведе во форма на ленено масло или мелено семе.
Вклучете го ленот со исхраната, но не користете повеќе од три лажички лен. Важно е да се држи дозата релативно ниска, бидејќи ленот е природен лаксатив. Можно е да се појави помека столица и/или дијареа ако се претера со количината. Ленот е одличен сојузник во борба против запек кај бебињата. Имајте на ум дека можете трите лажички лен да ги распоредите во неколки оброци во текот на денот.
Како и кај секоја нова храна, важно е да внимавате на евентуалните реакции и да разговарате со педијатарот на вашето дете за додавањето на лен во исхраната. Иако, ленот не се смета за висок алерген, сепак внимавајте на можните дигестивни проблеми.
Ленот мора да се чува правилно, бидејќи е многу чувствителен. Мелениот лен најдобро е да се чува во фрижидер, оти може брзо да ужегне и тогаш станува нездрав за јадење. Целото зрно лен не е така чувствително, подолго трае, но ленот има ефект единствено ако се користи мелен, не цел.
