Додека летните денови носат повеќе игра, помалку рутина и подолго време надвор, исхраната на децата често паѓа во втор план.
Токму во тие моменти, кога дехидрацијата, заморот и нерегуларните оброци можат да влијаат на здравјето на децата, нутриционистката Љиљана Путниковиќ открива кои грешки родителите најчесто ги прават кога станува збор за летните оброци и ужинки, и дава конкретни совети како со едноставни чекори оброците да останат здрави, практични и прилагодени на високите температури.
„Во текот на летните месеци, најчестите грешки на родителите се однесуваат на изборот на намирници и распоредот на оброците. Исто така, многу честа и потенцијално опасна грешка е несоодветното чување на храна при патувања и излети. Храна како млечни производи, месо и јајца лесно се расипува, а ако не се чува правилно, може да претставува сериозен ризик по здравјето на детето.“
Дополнително, додека се надвор, децата често го губат поимот за време додека играат и забораваат да јадат, а нивното тело троши многу енергија – особено при високи температури.
„Редовниот внес на храна и течности е исклучително важен. Прескокнувањето оброци може да доведе до пад на шеќерот во крвта, замор, раздразливост и намалена концентрација. Затоа е многу важно во текот на денот да им се нудат лесни, но хранливи оброци, во согласност со нивните потреби и активности.“
Најдобар избор за летна ужинка
Нутриционистката објасни и како да се осмисли ужинка што е балансирана и интересна за децата, но не бара чување во фрижидер, односно е практична за носење на плажа, базен или излет.
„Идеалната ужинка треба да има рамнотежа помеѓу јаглехидрати, протеини и здрави масти, да биде практична за носење, да не бара ладење, и секако – да им биде примамлива и вкусна на децата. Иако на прв поглед може да изгледа комплицирано, решенијата често се едноставни и веќе познати. Суви интегрални кекси или крекери во солена или слатка варијанта лесно се пакуваат, не се расипуваат брзо и претставуваат одличен меѓуоброк.“
Исто така, добар избор се и прои од пченкарно или интегрално брашно со сирење, подготвени во калапи за мафини, збогатени со различни видови семки. Добро познатиот „бабин колач“, кој се прави во скоро секој дом, со мала измена на рецептот и понатаму останува омилен кај децата и родителите. Може да се подготви во слатка или солена верзија, со додаток на сусам, сончоглед, тиквини семки, сечено суво овошје – и лесно се вклопува во секој планиран ден надвор.
Овошјето исто така секогаш е добар избор, нагласува нутриционистката.
„Банани и јаболка се идеални за носење, додека во кутиите за ужина однапред може да се спакуваат излупени мандарини, портокали, грозје, праски или друго сезонско овошје што детето го сака. Мешавини од јаткасти плодови и суво овошје – како ореви, бадеми, лешници, индиски ореви, суво грозје, кајсии или брусници – обезбедуваат ситост, енергија и дополнителна нутритивна вредност. Сурово сечен зеленчук, како моркови, пиперки или ротквици, може да биде интересна, крцкава ужинка, а варената пченка останува практично и омилено летно освежување.“
