Од моментот кога ќе се роди детето, тоа веќе има се што му е потребно за да го развие својот говор. Иако детето има се што му треба, родителите можат да му помогнат на детето да прозбори на време, а логопедот Анжелика Новгородова советува и како.
- Разговарајте со бебето што е можно повеќе
Колку и да звучи тривијално, најдобриот начин да го поттикнете развојот на говорот на вашето бебе е постојано да му зборувате, а тоа го потврдиле и многу студии. Можете да почнете да разговарате со вашето бебе уште додека е во стомакот, а секако и веќе од првите денови од животот.
- Направете поволна средина
За да може детето да го совлада говорот, прво мора да совлада некои вештини и звучната структура на јазикот што се зборува околу него. Ако постојано разговарате со детето, тоа едноставно ќе биде опкружено со јазик и тоа ќе го поттикне да комуницира со другите.
Имајте на ум дека телевизорот што е постојано вклучен како некаков позадински шум може да го забави развојот на говорот, во споредба со децата кои постојано се опкружени со жив јазик.
Исто така, забележано е дека до тригодишна возраст, коефициентот на интелигенција е многу поголем кај децата чии родители доволно разговараат со нив. Гласовите на домаќинството – мајки, татковци, тетки, чичковци – се вистинска музика за ушите на бебето. Имајте на ум дека ништо не може да го замени вашето присуство за бебето, ниту песни, телевизија, телефон…
- Нагласувајте ги самогласките
Кога му читате на детето или кога разговарате со него, нагласете ги самогласките, бидејќи најлесно на малите им е да ги слушнат овие звуци и да ги изговорат. Можете исто така да побарате од детето да го повтори звукот што го кажувате, да ја смени интонацијата, па малечкото ќе вежба да го контролира гласот.
- Читајте книги, раскажувајте приказни и пејте песни
И на децата, како и на возрасните, асоцијациите им се многу важни, па кога на детето му читате книга, добро е да му покажете слики на различни теми. Обидете се детално да му објасните што гледа на сликите.
Исто така и пеењето детски песни е добро за развојот на говорот бидејќи содржат многу ритмички повторувања, а ритамот е многу важна компонента во развојот на говорот, вели логопедот.
- Не создавајте притисок
Една од најважните работи е да не се врши притисок врз детето, да се обиде да создаде позитивна атмосфера и да го поддржи детето во процесот на зборување.
Не го споредувајте детето со други деца, особено во негово присуство. Важно е малиот да не почувствува дека сте загрижени за неговиот говор, да не чувствува дека сте разочарани затоа што не може да комуницира со вас како што вие би сакале.
Природната комуникација секако ќе даде резултати, а бебето ќе ве воодушеви побрзо отколку што мислите со неговиот сладок глас и првите зборови.
Кога се обидувате да му помогнете на малечкото да зборува, главната работа е да имате трпение, вели логопедот.
