Постои голема веројатност мајката да се породи во истиот месец кога и самата е родена, а истражувачите мислат дека ја знаат причината за овој феномен. Според податоците од повеќе од 10 милиони раѓања во Франција и Шпанија, раѓањата во потесното семејство обично се групираат во рамките на одреден месец.
„Се чини дека потенцијалните објаснувања се и социјални и биолошки“, вели истражувачот и епидемиолог Адела Ресио Алкаид. Таа и нејзините колеги забележале дека луѓето со слично потекло имаат деца приближно во исто време од годината, а се чини и дека реагираат на различни фактори на животната средина кои влијаат на биологијата на плодноста.
Што покажало истражувањето?
За оваа студија, истражувачите ги анализирале сите раѓања во Шпанија од 1980 до 1983 и од 2016 до 2019 година, како и сите раѓања во Франција од 2000 до 2003 и 2010 до 2013 година. Раѓањата во дадена земја имаат тенденција да го следат моделот што истражувачите го нарекуваат „сезонско раѓање“, каде што се раѓаат повеќе бебиња во одредени периоди од годината отколку во други, пишува MedicineNet.
Но, кога истражувачите ги групирале податоците врз основа на месецот на раѓање на мајките, тоа не го следел очекуваниот модел, велат истражувачите. Наместо тоа, тие откриле нагло зголемување на бројот на родени во јануари помеѓу мајките родени во јануари, скок во бројот на бебиња во февруари межу мајките родени во февруари и итн.
Севкупно, имало речиси пет проценти повеќе раѓања отколку што би се очекувало таму каде се поклопува месецот на раѓање на мајката и нејзините бебиња, за двете земји и за сите проучувани периоди.
