СОС телефонот за деца и млади за 2021 год., сега именуван како „Ало Бушавко“, кој работи под закрила на Првата детска амбасада во светот „Меѓаши“ во измината 2021 гoдина често ѕвонел, но како гененерална забелешка е малиот број деца кои се јавиле. „Од таа причина неопходно е да се работи на охрабрување на децата и младите да се јават за да се информираат или за да пријават прекршување на нивните права“, апелираат од ПДАС Меѓаши, кои на вчерашната прес-конференција ги презентираа наодите од Годишниот извештај на СОС телефонот за деца и млади за 2021 год., а беше промовирана и новата веб платформа „Ало Бушавко“.
Насилството и понатаму претставува реалност за децата во Македонија. Податоците од извештајот покажуваат дека многу деца се во ризик од насилство со што се влијае на нивниот оптимален психофизички развој. Телесното казнување сè уште доминира како начин за воспитување на децата, покрај психолошката трага што тоа ја остава врз децата за цел живот
„Во текот на 2021 година добиени се вкупно 329 повици, а вкупниот број деца и млади кои се опфатени со случаите изнесува 449 (198 машки, 176 женски деца, а за 75 деца не е познат полот). Споредбено со минатата година, бројот на случаите е зголемен за над 37 %. Според возрасната група, најмногу од дојавите се однесувале на деца на возраст од 10 до 12 години. Најголемиот број од децата или 390 живеат во урбана средина, а 253 од вкупниот број јавувачи се Македонци“, објаснуваат од „Меѓаши“.
„Трендот на продолжување на пријавување проблеми со остварување на правото на контакт или средби на децата со разведени родители и непочитување на решението од Центарот за социјални работи котира повторно на високото прво место во категоријата проблеми. Податоците говорат дека прекршувањата на правата на детето при бракоразводна постапка е еден од најголемите проблеми со кои се соочуваат децата и нивните семејства, а ова ни укажува на фактот дека потребно е подобро и поквалитетно регулирање на семејните односи и поголемо внимание и поддршка од страна на надлежните институции со цел да се превенираат дополнителни кршења на детските права“, се вели во резимето на наодите од работата на СОС-телефонот за деца и млади во 2021 година.
Притоа се наведува дека застапени се проблемите кои се јавувааат при доделување старателство, како и исплаќање на алиментација. „Покрај правото на детето за остварување контакт или средби со едниот од родителите, имаме дојави и за прекршени права на детето за контакт со лица од поширокото семејство (бабата, дедото, тетка, чичко, братучеди…).“
Насилството и понатаму претставува реалност за децата во Македонија. Податоците од извештајот покажуваат дека многу деца се во ризик од насилство со што се влијае на нивниот оптимален психофизички развој. Телесното казнување сè уште доминира како начин за воспитување на децата, покрај психолошката трага што тоа ја остава врз децата за цел живот. Навидум невидливо во однос на другите облици на насилство, емоционалното насилство се случува многу често и е еднакво опасно како и сите други облици. Спектарот на емоционална злоупотреба е широк, а се случува кога за детето не се води грижа, не се поттикнува на развој, се запоставува, се отфрла, се игнорира, се присилува, се казнува, се спречува да се поврзе со други луѓе од неговото опкружување… Исто така, емоционална злоупотреба е и кога детето е сведок на физичко или друг вид насилство. Во овој годишен извештај не е исклучена ниту сексуалната злоупотреба на децата“, додаваат од „Меѓаши“.
Неопходно е да се работи на охрабрување на децата и младите да се јават за да се информираат или за да пријават прекршување на нивните права
Во Извештајот се потенцира дека животните перспективи на децата во Македонија се засегнати заради изложеноста на сиромаштија. „Голем број деца со своите семејства живеат на работ на егзистенција, при што нивните детски права се сериозно загрозени. Кога зборуваме за суштински потреби, зборуваме за изложеноста на несоодветни услови за живот кои го попречуваат оптималниот раст и развој на децата…
Бракоразводните постапки и несогласувањата меѓу родителите на децата се во најголем број причини за детската вознемиреност и страв. Исто така, вознемиреноста кај децата може да се јави и како резултат на големи промени во нивниот живот, како преселба во нов дом, живеење со само еден родител, менување на училиштето и сл.“, се вели во резимето на наодите од работата на СОС-телефонот за деца и млади во 2021 година.
„Ало Бушавко“
На вчерашната пред конференција беше претставена и веб платформата за деца и млади „Ало Бушавко“, која претставува полесен и побрз начин на комуникација. „Со само еден клик децата, младите, но и возрасните може да допрат до нас, а и ние до нив“, велат од тимот на „Ало Бушавко“, кој го сочинуваат педагози, психолози, социјални работници, правници и волонтери/волонтерки од овие профили.
Децата и младите, како и сите оние кои се грижат за добросостојбата на децата, за нивните права, кои сакаат да укажат на злоупотреби, занемарувања, насилство, сиромаштија и експлоатација може да се обратат преку СОС телефонот: +389 (0)70 390 632 и/или +389 (0)2 2465 316 и веб платформата за деца и млади „Ало Бушавко“.
