Нерешената траума кај децата може да доведе до значајни последици во нивниот возрасен живот, објаснуваат експертите. Затоа децата мора да ја добијат потребната помош за да го дефинираат изворот на траумата и да го започнат процесот на оздравување. Зборувајќи за некои од вообичаените трауми од кои страдаат децата, Пријанка Капур, виш клинички психолог вели:
„Гледам деца кои минуваат низ запоставување, психичко, физичко или сексуално злоставување. На ова додадете го и насилството во училиште или во заедницата, сведочење на насилство во домот, сериозни несреќи, болести на најблиските опасни по живот, ненадејна или насилна загуба на сакана личност, малтретирање или расизам, природни катастрофи.“
Како што објаснува Капур, траумата може да биде последица на едно случување или повторување на трауматски искуства. Одговорот на детето на трауматски настан ќе биде единствен, во зависност од неговата возраст или степен на развој. И тука улогата на родителите станува уште попресудна. Имено, дури и кога детето повеќе не е во опасност, неговото тело останува во таканаречена будна состојба, ослободувајќи хормони на стрес во телото кои ја попречуваат неговата способност да обрне внимание, да спие или да има социјални интеракции со другите.
Вообичаени знаци на траума
Траумата може да се манифестира на различни начини, поради што е важно да се знаат знаците на траума кај децата, бидејќи ефектот од нерешената траума може да трае со години, вели психологот. Родителите често пропуштаат некои очигледни знаци на траума како што се:
- Потешкотии со концентрацијата и со спиењето
- Нагли промени во телесната тежина
- Фрустрации
- Проблеми со исхраната
- Интензивни изливи на бес
- Повлеченост
- Препуштање на дневно мечтаење.
Што можат да направат родителите?
Родителите можат да обезбедат безбеден простор за своето дете со преземање на следниве чекори, според Пријанка Капур. Тоа се прифаќање на емоциите и однесувањето на детето, трпеливо слушање, забележување суптилни промени во однесувањето, избегнување каква било осуда и покажување сочувство. Исто така, психологот објаснува дека е важно да му дадете до знаење на детето дека секогаш ќе бидете покрај него, без разлика на се.
