„Модерна“ ќе започне да ја испитува вакцината против COVID-19 кај мали деца „наскоро“, но податоците најверојатно нема да бидат достапни до 2022 година, изјави извршниот директор на компанијата Стефан Бансел во понеделникот на виртуелна конференција на ЏПМорган.
Студијата кај деца од 11 години и помлади „ќе трае многу подолго, ќе започнеме со помала доза. Значи, не треба да ги очекуваме клиничките податоци во 2021 година, поверојатно е во 2022 година“, рече Бансел.
Тој додаде дека „Модерна“ има за цел дозволата за употреба на нејзината вакцина да се прошири на адолесценти на возраст од 12 години и постари до ова лето, за да можат да се вакцинираат децата пред да се вратат на училиште во септември.
„Модерна“ има за цел дозволата за употреба на нејзината вакцина да се прошири на адолесценти на возраст од 12 години и постари до ова лето, за да можат да се вакцинираат децата пред да се вратат на училиште во септември
Минатиот месец, Управата за храна и лекови даде итно одобрување на вакцината против COVID-19 на „Модерна“ за лица на возраст од 18 години и постари. Вакцината, која има стапка на ефикасност од 94,1% за да ги заштити луѓето од вирусот, се потпира на гласникот РНК за да го поттикне телото да го произведува шилестиот протеин на коронавирус, што пак, предизвикува имунолошки одговор. Вакцината на „Фајзер“, која има слична стапка на ефективност, исто така користи mRNA.
И за вакцините на „Модерна“ и на „Фајзер“ се потребни две дози, во интервал од околу еден месец. За време на конференцијата, Бансел за вакцината на „Модерна“ рече дека „очекувањата се вакцинацијата да трае најмалку една година“.
Извршниот директор се надева дека ќе испорачаат помеѓу 600 милиони и 1 милијарда дози на вакцини оваа година.
Досега, вакцинацијата против COVID-19 во САД се одвива бавно, според Американскиот центар за контрола и превенција на болести. (Бизнис инсајдер)
