Новороденче просечно спие околу 16 часа дневно, но кај некои бебиња тоа може да биде 18 до 20 часа, па дури и повеќе. Сепак, ако ви се чини дека бебето постојано е поспано, природно е да се запрашате дали спие премногу.
“Понекогаш во првиот месец од животот, бебињата може да бидат многу поспани. Проблемот не е колку бебето има затворени очи, туку се работи за количината на храна која му е потребна. Многу е важно да се погрижите бебето доволно да јаде, без разлика колку спие“, вели педијатарот Даниел Ганијан.
Според него, за бебе кое се храни со мајчино млеко, тоа значи да јаде од 8 до 12 пати на ден, а за бебе на адаптирано млеко од 5 до 8 пати дневно.
ТРЕБА ЛИ БЕБЕТО ДА БУДИ ПОРАДИ ХРАНЕЊЕ?
“Ако бебето е постаро од една недела и повторно дошло до својат родилна тежина со здраво темпо, во ред е да се остави да спие“, објаснува д-р Диана Вест, советник за доење.
Всушност, според Американското здружение на педијатри, повеќето здрави бебиња не треба да се будат за хранење.
“Ако новороденчето во првата или втората недела спие повеќе од три часа одеднаш, а вашиот педијатар не е задоволен со ритамот со кој бебето добива на тежина, може да се препорача будење на бебето поради хранење. Ова особено важи за бебиња кои се родени порано или кои имаат кардиолошки проблеми“, објаснува д-р Питер Гринспан, педијатар.
Вашиот педијатар ќе ја мери тежината на детето секој пат кога ќе отидете кај него, за да види како детето напредува.
“Ако видиме дека детето добива доволно калории, тоа значи дека доволно јаде и дека нема потреба да се буди за хранење. Но, потребни се неколку недели по породувањето, за да лекарот има доволно податоци за растот и препораки за хранењето. Дотогаш, најдобро е да му обезбедите на вашето новороденче да јаде секои два до три часа“, објаснува д-р Ганијан.
