Дури и сосема вообичаени работи, како кивањето, за време на бременоста можат да ве натераат да се запрашате: што се случува со вашето бебе во матката кога тоа ќе се случи? А што ако за време на кивањето почувствувате болка? Дали кивањето може да влијае на фетусот?
За почеток, експертите нагласуваат дека дури ни најсилното кивање не може да го повреди вашето бебе. „Не треба да се грижите ако кивате додека сте бремени“, изјави д-р Камилa Филипс, сертифициран гинеколог. „Кивањето предизвикува брзо, но привремено зголемување на притисокот во стомакот.“ Сепак, овој краткотраен притисок не може да ѝ наштети на „тврдината“ што ја претставува матката. „Дебелиот мускул на матката и амнионската течност што го опкружува бебето му обезбедуваат одлична заштита од ваквите промени во притисокот“, објаснува лекарка.
„Бебињата можат да почувствуваат дека мајката во тој момент кива и може да се поместат или да реагираат на тоа“, додава д-р Алис Сатон, асистент клинички професор на Универзитетот во Сан Диего.
Што точно се случува кога кивате додека сте бремени?
Иако кивањето на никаков начин нема да му наштети на вашето бебе, кај вас може да предизвика непријатност, како ненамерно мокрење. „Кај некои жени се јавува стресна уринарна инконтиненција, односно истекување на урина при кивање или кашлање поради зголемен притисок врз мочниот меур“, вели Сатон. „Постојат третмани за инконтиненција, вклучувајќи и физикална терапија, затоа информирајте го вашиот лекар ако ви се случи ова.“
Доколку сте загрижени затоа што кивањето ви предизвикува болка, важно е да знаете дека бебето не чувствува болка. „Ако бремената жена почувствува затегнатост или остра болка во стомакот при кивање, најверојатно станува збор за таканаречена ‘болка во кружниот лигамент’“, објаснува Сатон. „Кружните лигаменти ја поддржуваат матката, а како што бебето расте и станува потешко, многу жени чувствуваат болка што се шири од колковите кон препоните, а понекогаш и длабоко во вагината.“
Може ли фетусот да го почувствува или да го слушне кивањето?
„Делот од нервниот систем на фетусот што подоцна ќе стане мозок започнува да се развива кон крајот на првиот триместар, а сетилниот нервен систем исто така почнува да се развива во тој период“, вели Сатон. „Сетилните дразби можат да стигнат до мозокот на фетусот околу 24-та до 25-та недела.“
Во матката, фетусите постојано се изложени на „внатрешна симфонија“: циркулацијата на крвта, отчукувањата на вашето срце, па дури и звуците од дигестивниот систем. Покрај тоа, постои можност да слушаат и надворешни звуци – музиката што ја пуштате во автомобилот или звукот од телевизорот.
Сепак, Сатон нагласува дека не е целосно јасно што точно бебето во развој може да слушне, а што не, дури и ако мозокот веќе може да ги регистрира тие сигнали. „Нервниот систем на фетусот продолжува да се развива и во третиот триместар. Самото постоење на нервни врски не значи дека знаеме како фетусот ги доживува овие сензации“, објаснува таа. „Затоа е тешко точно да се каже кога бебето почнува да ги перципира внатрешните и надворешните звуци и движења, но тоа може да биде во текот на вториот триместар.“
