♦♦♦♦♦♦♦
Само 14 проценти од пациентите по оздравувањето немаат никакви компликации, а сите други имаат, при што 50% имаат и психолошки проблеми, а 15% PTSD (посттрауматско стресно нарушување)
Професионалниот нуркач Емилијано Пескароло се заразил со коронавирус во март и поминал 17 дена во болница во италијанскиот град Џенова.
Сега, три месеци подоцна, Емилијано (42) сè уште има потешкотии со дишењето и вели дека дури и кратка прошетка му изгледа „како искачување на Монт Еверест“ и дека останува „без здив дури и ако само зборува“. Пескароло е една од неколкуте десетици луѓе кои се наоѓаат на рехабилитација во специјализирана клиника во Џенова. Во Велика Британија, меѓусебно се поврзуваат „лица кои долготрајно страдаат“, заедно барајќи помош поради последиците на вирусот, за кои сè уште не се знае доволно.
Додека здравствените власти во Велика Британија и Италија, двете земји најтешко погодени од пандемијата на коронавирус во Европа, започнуваат да нудат услуги за рехабилитација, се чини дека тоа најверојатно ќе биде масовно, пишува Си-Ен-Ен, бидејќи истражувањата покажуваат дека COVID-19 е „мултисистемска болест“ која може да ги оштети не само белите дробови, туку и бубрезите, црниот дроб, срцето, мозокот и нервниот систем, кожата и гастроинтестиналниот тракт.
Д-р Пјеро Клаварио, директор на Институтот за рехабилитација од COVID-19 во Џенова, вели дека на почетокот на истражувањето за последиците од болеста е веќе утврдено дека само 14 проценти од пациентите по оздравувањето немаат никакви компликации, а сите други имаат, при што 50% имаат и психолошки проблеми, а 15% PTSD (посттрауматско стресно нарушување).
„Она што најмногу ме изненадува е тоа што дури и пациентите кои не биле на интензивна нега се екстремно слаби: нема докази дека имаат кардиолошки или проблеми со белите дробови, но не се во состојба да се качуваат по скали“, изјави Клаварио, додавајќи дека овие луѓе имаат „сериозна мускулна слабост“.
Им се помага со вежби за физичка рехабилитација, а после месец и половина има одредено подобрување. Нуркачот Пескароло се надева дека ќе може да се врати на работа кон средината на август, скоро половина година откако се разболе.
Додека здравствените власти во Велика Британија и Италија, двете земји најтешко погодени од пандемијата на коронавирус во Европа, започнуваат да нудат услуги за рехабилитација, се чини дека тоа најверојатно ќе биде масовно, пишува Си-Ен-Ен, бидејќи истражувањата покажуваат дека COVID-19 е „мултисистемска болест“ која може да ги оштети не само белите дробови, туку и бубрезите, црниот дроб, срцето, мозокот и нервниот систем, кожата и гастроинтестиналниот тракт
Сепак, и покрај неговиот физички напредок, Пескароло вели дека има потешкотии да се сконцентрира и дека е многу загрижен за слабоста на неговиот ум: „Особено ми е лошо краткорочното помнење, дури не се сеќавам ни на едноставни работи“.
Слични проблеми („мозочна магла“, замор, отежнато дишење) имаат и други поранешни пациенти со COVID-19, а сè уште не е познато колку долго би можеле да потраат ваквите последици.
Пескароло, нуркачот од Џенова, ги повика оние кои како и него и понатаму трпат последици од COVID-19, да не губат надеж дека ќе се вратат во нормалниот живот.
„Не се откажувајте“, вели тој.
„За рехабилитација е потребно околу четири до шест месеци – во мојот случај. На луѓето кои имаат поголеми проблеми од моите можеби ќе им треба повеќе време, но не треба да се откажуваат“.
