Повеќето родители барем еднаш се соочиле со надуен стомак кај своето дете – состојба која често е проследена со болка, непријатност и нервоза. Проблемот е што малите деца ретко можат прецизно да објаснат што чувствуваат.
„Децата сè уште немаат доволно зборови за да ја опишат болката како што е надуеноста“, објаснува Tамара Дукер, експерт за дигестивно здравје. „Најчесто само ќе кажат дека ги боли стомак.“
Следниот пат кога детето ќе се пожали на болка, а стомакот изгледа отечен, размислете за некоја од овие можни причини:
1. Детето голта воздух (аерофагија)
Голтањето дополнителен воздух – состојба позната како аерофагија – може да предизвика надуеност, мачнина, па дури и губење на апетитот. Некои деца голтаат повеќе воздух кога се вознемирени или анксиозни, како и при џвакање гума за џвакање.
Како да помогнете:
Разговарајте со детето за тоа што го загрижува и научете го едноставни техники за длабоко и бавно дишење. Намалувањето на анксиозноста често ги намалува и стомачните тегоби.
2. Детето има запек
Запекот е чест проблем кај децата, но родителите не секогаш го забележуваат – особено ако детето веќе самостојно оди во тоалет. Чест тригер е задржување на столицата, бидејќи детето не се чувствува пријатно да користи јавен или туѓ тоалет. Тоа може да доведе до болка, тврд и надуен стомак.
Како да помогнете:
Зголемете го внесот на растителни влакна и течности, поттикнете редовна физичка активност и создадете рутина за одење во тоалет. Ако станува збор за хроничен запек, задолжително консултирајте се со педијатар или гастроентеролог.
3. Интолеранција на лактоза
Интолеранцијата на лактоза – неможност за правилно варење на природниот шеќер во млекото – често се појавува во детството или адолесценцијата. Симптомите како надуеност, гасови и пролив можат да се јават дури 6 до 10 часа по консумирање млечни производи.
Тоа значи дека млекото испиено наутро може да предизвика тегоби дури навечер.
Како да помогнете:
Ако се сомневате на интолеранција на лактоза, разговарајте со педијатар. Можно е да биде потребно прилагодување на исхраната или дополнителни испитувања.
4. Синдром на иритабилно црево
Синдромот на иритабилно црево често се смета за состојба кај возрасните, но многу луѓе ги имале првите симптоми уште во детството. Одредена храна што е честа во детското мени – како млеко, одредени овошја, преработена храна и чоколадо – може да биде тригер за запек или пролив поврзани со овој синдром.
Како да помогнете:
Консултација со диететичар специјализиран за дигестивни нарушувања може да помогне во креирање соодветен режим на исхрана. Понекогаш решението е едноставно – како зголемување на внесот на влакна.
Иако надуеноста најчесто е безопасна и минлива, повторливите или силни симптоми секогаш заслужуваат внимание. Внимателното следење на навиките, исхраната и однесувањето на детето може да ви помогне побрзо да ја откриете причината – и да му олесните.
