Ентеровирозите, акутни инфекции предизвикани од ентеровируси, се јавуваат во текот на летото, а најчесто кај децата и младите. Всушност, станува збор за воспаление на слузокожата на фаринксот и респираторниот тракт, а може да ја зафати и цревната слузница што предизвикува чести водени столици и повраќање. Покрај тоа, болеста се манифестира и со покачена температура, абдоминална болка и болки во грлото.
Антибиотиците, како и кај другите вируси, не помагаат, па не треба ниту да очекувате ниту да ги барате од лекар
Најчест начин на зараза се валканите раце, па затоа главен начин за борба против летните вируси е честото и темелно миење на рацете, пред јадење и секако после одење во тоалет. Надвор од домот, добро е да користите влажни марамчиња со средство за дезинфекција и гелови за суво миење на рацете кои се погодни за патување. Болеста може да биде придружена со раздразливост, летаргија, слаб апетит и главоболка.
Нагло зголемување на температурата
Бидејќи не постои посебен лек за третман на ентеровирози, терапијата е симптоматска. Најважно е намалување на температурата, внесување доволно течности и одмор, што е и основа на лекувањето.
Најопасниот несакан ефект на благите летни вирози е дехидратација, па затоа е исклучително важно постојано да се хидрира организмот. Ако се работи за мало дете, сепак најдобро е да се консултирате со лекар во рок од 24 часа од почетокот на симптомите бидејќи бебињата побрзо дехидрираат.
Летните вирози во просек траат три до четири дена, што во голема мера зависи од клиничката слика и имунолошкиот статус на детето. Лесно може да се препознаат по неспецифичните температури. Нивниот почеток е ненадеен и бурен, а децата имаат температура меѓу 38 и 40 степени, малаксани се и понекогаш се жалат на главоболка заедно со дијареја и повраќање.
Антибиотиците не помагаат
За да се спречат ентеровирозите и да се скрати нивното времетраење доколку детето сепак се разболи, важно е постојано да се одржува хигиената на носот со навлажнување со солен раствор, како и хигиената на ушите. Антибиотиците, како и кај другите вируси, не помагаат, па не треба ниту да очекувате ниту да ги барате од лекар. Неопходно е да се посети лекар само ако детето е малаксано и не можете сами да го рехидрирате бидејќи повраќа и има дијареја. Дополнително, симптомите, во зависност од видот на вирусот, може да бидат и болни меурчиња или рани на непцето, конјунктивитис или егзантем (осип што може да личи на сипаници).
