Многу “нови“ родители се водат по советите на своите мајки и баби кои најчесто советуваат да детето кога има зголемена температура треба добро да се затопли и да се препоти.
Тоа е една од најчестите грешки што ја прават младите родители бидејќи тоа не е добар совет за намалување на температурата кај децата. Токму спротивното. Претераното загревање на детето со зголемена температура може лесно дополнително да ја зголеми температурата. Детето треба да се расоблече или да му се облече полесна облека, секако детето треба да се истушира со млака вода за да се намали температурата.
Често родителите се жалат дека нивното дете не сака да мирува додека има зголемена температура. Не инистирајте на мирување. Дозволена е умерена активност, а по тоа и полесно ќе забележите и каква е општата состојба на детето. Детето може да биде малакано и во лоша општа состојба и без зголемена температура, затоа немојте да мислите дека нема опасност само затоа што изостанал симптомот на зголемена температура.
Покривањето на дете кое има зголемена температура со мокар пешкир е исто една од лошите идеи. Тоа може да предизвика тресење на телото и дополнително да зголеми телесната температура. Ако температурата е висока, млаки облоги или туширање со млака вода ќе бидат попријатни за детето. Високата температура ја зголемува потрошувачката на калории, затоа на детето му се потребни повеќе од вообичаено.
Ако детето одбива храна, обидете се со засладена течност што ја сака.
