Сите сме го поминале тоа. Детето почнува да кива и да си го брише носот, а за миг и ние самите ги чувствуваме симптомите на вироза, настинка или нешто полошо.
Обидете се да го зачувате здравјето покрај често болни деца
Кога детето секојдневно оди во јасли, градинка или училиште, тешко е да се избегне дека сите тие вируси од градинка ќе не нападнат и нас. Но, сепак можеме да преземеме неколку чекори за да се обидеме да го зачуваме сопственото здравје.
Хранете се здраво
Здравата храна, како на пример зеленото лиснато зеленчук, нема целосно да спречи да се разболите, но ќе ве зајакне и ќе ви даде потребна енергија. Ако ве нападне некоја болест, барем ќе бидете поспремни да се борите.
Подигнете го имунитетот
Витамини, вакцини, разни препарати за подигнување на имунитетот исто така не се 100% заштита од болести, но ќе му дадат на вашиот организам поголема шанса да се одбрани и побрзо да ја преболедува вирозата или грипот.
Многу одмор
Можеби звучи како добра шега, но добриот одмор вреди злато. Скратете ги вечерните задачи и обврски за да можете да легнете во разумно време и добро да се наспиете. Исто така, ако чувствувате дека ви е „сè преку глава“, замолете некого да ги причува децата неколку часа додека не ја повратите барем дел од силата.
Чувајте се од кивање
Не е голема мудрост, но да ги научите децата да не киваат директно во вас и да ја стават раката пред уста додека тоа го прават, е голем чекор во превенцијата од болести. Потоа, секако, потребно е да ги измијат рацете со сапун и топла вода. Запомнете — тешко ќе останете здрави ако сте постојано „нападнати“ од кивања од сите страни.
Мијте ги рацете – често
Оваа најосновна хигиенска навика може да направи огромна разлика во зачувувањето на вашето здравје. Веројатно вашите раце се постојано зафатени со фрлање искористени хартиени марамчиња, местeње кревет и облека на болното дете и слично. Сапунот и топлата вода се одличен сојузник во спречувањето на ширењето бактерии од вашите раце кон околината.
Внимавајте на заразните површини
Површини како што се вратата на фрижидерот, послужавниците на детските високи столчиња, работната плоча во кујната – сето тоа се места погодни за преживување на разни бактерии, па затоа треба добро и често да се чистат. Не ги занемарувајте ни другите површини во домот, особено оние кои ги делите со болните деца.
Нема делење
Децата сакаат да и ја стават играчката во уста на мама или да споделат колаче, сламка и слично. Но, ако се болни, заборавете на делење храна, пијалоци и други работи кои ги допирале со рацете.
Карантин
Како што нема делење, така треба да бидеме одговорни и да ги одвоиме децата од пријателите и другите членови на семејството кои би можеле да се заразат.
Исто така, вашите деца, ако им е ослабен имунитетот, може полесно да „фатат“ вироза од некое друго дете чија мајка исто така не сакала да постапи одговорно.
Затворете ја кујната
Кујната е просторија во која се подготвува храна за целото семејство и треба да ја заштитите од бактерии. Децата сакаат да помагаат при готвење, но малите рачиња кои претходно бришеле носови и допирале уста сигурно не се добредојдени во храната на останатите членови на семејството.
