Родителството е тешко и не постои правилен начин за воспитување на децата. Она што функционира за една мајка, еден татко или едно дете не мора да биде прифатливо за друго семејство. Меѓутоа, една неодамнешна студија објавена во списанието Medical Journal Epidemiology and Psychiatric Sciences, сугерира дека еден одреден стил на родителство може да ги изложи вашите деца на поголем ризик од проблеми со менталното здравје.
Утврдено е дека стиловите кои вклучуваат строга дисциплина и прекумерна контрола, познати како непријателско или агресивно родителство, речиси двојно го зголемуваат ризикот децата да развијат симптоми на ментални здравствени проблеми, покажало истражувањето во Ирска и Велика Британија.
Студијата следела 7.500 деца на возраст од 9 месеци до нивната 9. година. Децата кои биле изложени на непријателско родителство на 3-годишна возраст имале 1,5 пати поголема веројатност да бидат изложени на висок ризик од развој на проблеми со менталното здравје на возраст од 9 години.
Децата од побогати средини, имале помала веројатност дека ќе покажат симптоми на ментални проблеми, додека децата со еден родител биле изложени на поголем ризик од проблеми. Исто така, женските деца почесто биле во високоризичната група.
Што е непријателско родителство?
Непријателското родителство е агресивен родителски стил, било физички или вербално. Родителите често го следат поради незнаење, искуство, стрес или безнадежност, веројатно поради сопствената ситуација. Овој тип на родителство би можел да се нарече и авторитарно родителство. Накратко, родителот има свој пристап и детето не може да разговара со него, а грешките често доведуваат до казнување. Децата кои се воспитувани на овој начин имаат повисоко ниво на агресија и може да се побунат против авторитети додека растат.
