Пред една секунда вашето дете било покрај вас, а сега одеднаш никаде не можете да го видите. Во таквите моменти крвта на секој родител му се замрзнува во вените, а шок доживуваат и сите околу вас.
За жал, родителите и децата се губат секој ден во гужви, во трговски центри, настани каде има многу луѓе, на плажи. Ако ви се случи ваков шок, важно е вие и вашето дете да сте добро подготвени за оваа ситуација.
Како да се однесувате ако детето се изгуби
- Соберете се за да можете да дејствувате со цел.
- Размислете каде последен пат сте го виделе вашето дете.
- Веднаш повикајте го детето гласно кога ви се чини дека исчезнало.
- Веднаш информирајте ги присутните дека детето го нема. Опишете го изгледот и облеката на вашето дете, а исто така наведете го неговото име и возраст. Колку повеќе луѓе ја слушаат оваа информација, толку се поголеми шансите некој брзо да го забележи.
- Ако е можно, обратете се на лица кои можат дополнително да повикаат помош или преку звучник да кажат дека детето исчезнало. Тоа се обезбедување, касиери во супермаркети, модератори на настани или чувари.
- Повикајте полиција или пожарна служба, ако имате чувство декка брзата потрага нема резултати.
Корисни мерки на претпазливост како превенција
Се разбира, мерките на претпазливост и советите како да се однесувате во ваква ситуација не можат да ги опфатат сите можни ситуации, но ви овозможуваат вас и вашето дете да реагирате најдобро што можете. Однапред се препорачуваат две едноставни мерки:
Совети за родителите
Напишете го вашиот телефонски број на парче хартија и ставете го во џебот од панталоните, чантата на рамо или ранецот на вашето дете. Можете исто така да го напишете вашиот телефонски број и име на раката на детето (со маркер) или внимавајте да е на место каде што нема лесно да се избрише.
Секогаш имајте актуелни слики од вашето дете на вашиот мобилен телефон и погрижете се секогаш да го имате мобилниот покрај вас.
Што да се научи детето
Многу е корисно претходно да разговарате со детето за правилата на однесување во случај да се изгуби. Разговарајте за овие правила одвреме-навреме. Ова ќе ви даде вам и на вашето дете малку поголема сигурност.
- Секогаш треба да остане блиску до вас или да ви се јави пред да сака да оди некаде.
- Ако навистина се изгуби, кажете му да остане на местото каде се затекнало и да не се обидува само да ве бара.
- Ако му е потребна помош, нека се обрати на возрасно лице, најдобро некоја жена, и да и го покаже вашиот телефонски број. Таа може да ви се јави и да ви каже каде е вашето дете.
- Ако се изгуби во продавница, веднаш треба да оди до касите. Кажете му на вашето дете да чека на каса додека не го земете.
- Објаснете му на вашето дете дека никогаш не треба да оди каде било со странци, освен ако не е некој од полиција или противпожарна служба.
- Кажете му на детето дека не треба да се плаши ако ги следи овие правила на однесување.
