Во одредени средини во кои децата се вклучени во текот на својот развој (градинка, училиште), почнуваат да развиваат натпреварувачки дух. Додека родителите ја гледаат важноста на учествување, забава, тимски дух и вклученост на своето дете во разни активности – победата некако станува најважниот мотив за детската акција.
Да се победува е убаво, но објаснете им на децата дека пред се е важно да уживаат во самата игра
Колку и да е важно и убаво да се победи и да се биде најдобар, важно е децата, барем од една причина, да научат колку е важно и самото учество. А таа причина е едноставна – децата не можат и нема во секој период од животот да можат да бидат на врвот и во тој случај падот би можел да ги заболи доколку не ја сфатат суштината на самото играње.
Како да ги поттикнете децата да уживаат во самата игра, без да обрнуваат толку многу внимание на победата? Еден од подобрите реквизити за учење на децата да се фокусираат на процесот, а не само на конечниот исход, се коцките. Играњето со коцки никогаш не е здодевно, а има безброј можности. Детето реди нешто конкретно и се движи кон зададена цел, а вие можете да ги искористите следните инструменти за попатно да го научите на важноста да се создаде нешто:
- Пофалете го трудот, а не само крајниот резултат
Значи, има голема разлика ако го пофалите само крајниот резултат или целиот труд и посветеност.Објаснете му на детето дека е многу поважно да се надмине секој сегмент и пречка на патот, при што многу повеќе се учи, отколку успешно да направи нешто од прва. Ако детето не успее во нешто, така ќе го научите да го надмине разочарувањето и да обрне внимание на целиот процес и на драгоценото искуство стекнато при тоа.
- Слушнете ги сите детали на проектот
Родителите сакаат нивните деца да ги споделат нивните идеи, да развиваат речник и да споделуваат со нив се што забележале во текот на процесот. Понекогаш тоа може да биде сосема поинакво од она што самиот родител ќе го забележи и може да биде запрепастувачки. Поттикнувајќи ги децата да се изразат, да ја раскажат својата приказна, им ја зголемувате самодовербата и ги учите да развиваат сопствено размислување.
- Покажете интерес
“Кажи ми, како успеа да го направиш ова?“, со ова прашање му давате на детето можност да ви го раскаже целиот процес, од идеја, преку развој до самото настанување. Низ приказната, детето се повеќе се врзува за самото искуство, а не за крајниот резултат и уште еднаш ги минува сите фази на развој на неговото дело.
- Што сега ќе направиш?
Родителите често мислат дека нивните деца завршиле затоа што сакаат да им покажат нешто, но тоа не значи дека приказната е завршена. Но, кога имате играчка коцки, можностите за “обнова“ се огромни. Детето може повторно да игра и да создава свои креации и повторно ќе биде повеќе фокусирано на идните идеи отколку на резултатот од својата конструкција.
