Истражување на австралиските научници сугерираат дека децата кои користат таблети или гледаат телевизија повеќе од 14 часа неделно, може да бидат изложени на значително поголем ризик од развој на аутизам. Според податоците, двеиполгодишните деца кои поминуваат голема количина на време пред екраните покажуваат симптоми на аутизам до 12-годишна возраст.
Овој проблем веќе долго време го привлекува вниманието на експертите, но истражувачите кои следеле повеќе од 5.000 деца признале дека нивната студија може само да покаже поврзаност, но не и да докаже причинско-последична врска.
Научниците напоменуваат дека сè уште нема цврсти докази кои го поврзуваат времето поминато на екран со аутизмот. Сè уште не се познати точните причини за аутизмот, но познато е дека оваа состојба понекогаш се пренесува од родителите на децата. Истражувањата сугерираат дека аутизмот е почест кај децата од постари родители, како и кај мајките кои имаат прекумерна телесна тежина или имале компликации за време на бременоста.
Симптоми на аутизам
Едно од 50 лица спаѓа во спектарот на аутизам. Засегнатите деца може да имаат потешкотии да воспостават контакт со очите, да ги разберат чувствата на другите или да бидат многу заинтересирани за одредени теми. На децата со аутизам може да им треба подолго време да обработат информации или да повторат одредени дејства.
Неодамнешните студии воочиле поврзаност помеѓу времето поминато пред екраните и аутистичните карактеристики кај младите луѓе, истакнуваат истражувачите. Во новата студија, родителите на 5.107 деца биле анкетирани за времето кое нивното дете го поминува пред екран секоја недела. Последователна анкета, кога децата наполниле 12 години, истражувало дали децата добиле дијагноза на аутизам.
На 145 деца им бил дијагностициран аутизам. Истражувачите во списанието JAMA Pediatrics објасниле дека ризикот од аутизам „е значително поголем кај децата кои поминуваат повеќе од 14 часа неделно пред екран, во споредба со децата кои поминуваат помалку од 14 часа“. Тие, исто така, ги советуваа педијатрите да во текот на раната возраст ги прашаат родителите за времето поминато пред екран, како дел од пошироката проценка на развојот на детето.
Нови правила за време поминато пред екранот
Во септември, шведската агенција за јавно здравје ги советуваше родителите да не дозволуваат децата на возраст под две години да користат паметни телефони и таблети или да гледаат телевизија. Децата на возраст од две до пет години, исто така, треба да бидат ограничени на максимум еден час време на екран дневно. Слични препораки беа издадени и од данските власти во 2023 година.
