Родителите кои се склони да критикуваат често не сфаќаат дека му прават многу повеќе штета отколку добро на своето дете. Група невронаучници од Универзитетите Питсбург, Калифорнија-Беркли и Харвард одлучиле да истражат како родителската критика влијае на тинејџерите, особено на нивниот мозок. Во истражувањето кое вклучувало 32 тинејџери и 22 тинејџерки, научниците дошле до неверојатно откритие.
Истражувачите се фокусирале на три специфични делови во мозокот на тинејџерите – области поврзани со обработка на негативни емоции, области вклучени во регулација на емоциите и таканаречени нервни подрачја вклучени во разбирањето на перспективите на другите луѓе.
Тие набљудувале колку активности се случиле во овие области кога тинејџерите ги слушале нивните родители, особено нивните мајки, како ги критикуваат, во споредба со оние кога ги слушале нивните мајки како зборуваат за „неважни“ работи како купување на намирници. Тие, исто така, набљудувале дали има некакви промени во мозочната активност по разговорот со родителите.
Резултатите покажале дека кога тинејџерот слуша критика од родителите, неговиот мозок буквално се исклучува на неколку моменти. Имено, кога слушале критики, мозокот на тинејџерите покажувал поголема активност во областите вклучени во негативни емоции, но и значително намалена активност во региите вклучени во размислување, емоционална контрола и разбирањето на перспективите.
