На социјалните мрежи често се сретнуваат бројни лажни информации за вакцината против COVID-19 – од наводни заговори според кои на луѓето ќе им се вградуваат микрочипови до вести дека вакцината (некако) ќе успее да го измени нашиот генетски код.
Би-Би-Си праша тројца независни научници за стравот од промена на ДНК и сите тие категорично негираат дека вакцината против КОВИД-19 ја менува човечката ДНК.
Некои од новите вакцини, како што е онаа развиена од Pfizer/BioNTech и веќе одобрена во Велика Британија, користат фрагменти од генетскиот материјал на вирусот или т.н. гласник РНК.
„Вбризгувањето РНК во нечиј организам на никој начин не влијае на ДНК на човечките клетки“, вели професорот Џефри Алмонд од Универзитетот во Оксфорд. Функционира така што на организмот му дава упатство за производство на протеинот кој е присутен на површината на коронавирусот, а имунолошкиот систем потоа учи да препознава и да создава антитела против тој протеин.
Во антиваксерските објави обично се истакнува дека технологијата за вакцини со гласник РНК (mRNA) „досега не била тестирана ниту одобрена“.
Некои од новите вакцини, како што е онаа развиена од Pfizer/BioNTech и веќе одобрена во Велика Британија, користат фрагменти од генетскиот материјал на вирусот или т.н. гласник РНК
Вистина е дека вакцината со гласник РНК досега не била одобрена, но во последните неколку години се објавени бројни студии за вакцините со mRNA, кои се применети на луѓе.
Од избувнувањето на пандемијата, вакцината е тестирана на десетици илјади луѓе ширум светот и поминала низ ригорозен процес на лиценцирање. Како и сите нови вакцини, таа мора да помине строги безбедносни проверки пред да се препорача за широка употреба.
Во првата и втората фаза на клинички испитувања, вакцините се тестираат на мал број волонтери за да се провери нивната безбедност и да се утврди соодветната доза. Во третата фаза на тестирање, вакцините се тестираат на илјадници волонтери за да се утврди колку се ефективни.
Групата која ја примила вакцината и контролната група која примила плацебо се следат внимателно поради потенцијални несакани реакции, т.н. нуспојави. Следењето на безбедноста продолжува и откако вакцината ќе биде одобрена за употреба.
