Ако вашата мајка е сè уште првата личност на која се јавувате кога имате проблем, не сте сами, а науката сега има објаснување зошто е тоа така. Според истражувањето објавено во Journal of Neuroscience, врската мајка-ќерка е најсилната врска меѓу сите комбинации родител-дете, барем кога се гледа како мозокот ги обработува емоциите.
Додека односите меѓу мајките и синовите, татковците и ќерките и татковците и синовите често се полни со љубов и поддршка, истражувачите открија дека емоционалното разбирање е подлабоко кај мајките и ќерките. Причината, велат научниците, лежи во хемијата на мозокот.
Во истражувањето кое вклучувало 35 семејства, било откриено дека делот од мозокот кој ги регулира емоциите е многу посличен кај мајките и ќерките отколку во која било друга комбинација родител-дете. Тоа значи дека мајката полесно ќе сфати низ што поминува нејзината ќерка, бидејќи буквално може да се замисли во кожата на нејзината ќерка. Можеби тоа објаснува зошто понекогаш толку многу се расправате. Имено, исти полови на магнетот се одбиваат.
Мама како емоционален барометар
Ова откритие има пошироки импликации, особено кога станува збор за менталното здравје. Водечкиот автор на студијата, професорката по психијатрија Фумико Хоефт од Универзитетот Калифорнија, Сан Франциско, истакна дека токму овој дел од мозокот што го делат мајките и ќерките е поврзан со депресијата. Со други зборови, ако вашата мајка имала искуства со депресија, има поголеми шанси вашата ќерка да ја наследи, но добрата вест е што ова знаење може да се искористи за превенција и навремено дејствување.
Хоефт додава дека ова истражување е прво што ја користело технологијата на МРИ за проучување на структурата на мозокот низ генерации. Во иднина, таквото истражување би можело да помогне подобро да се разберат наследните обрасци во состојби како што се анксиозност, аутизам, зависност, шизофренија или дислексија.
Зошто мајките претпочитаат ќерки, а татковците повеќе синови?
Покрај ова истражување, и други се занимавале со силните семејни врски. Едно од нив покажало дека мајките често преферираат ќерки, додека татковците почесто ги претпочитаат синовите, бидејќи со нив споделуваат повеќе заеднички искуства. Друго истражување покажало дека врската помеѓу мајката и ќерката останува најсилна во сите фази од животот, дури и кога се менуваат семејните околности.
Научниците заклучуваат: оваа посебна врска не е само прашање на чувства, таа е запишана и во мозокот.
