Галењето помага во развојот на мозокот на бебето, особено кај оние бебиња кои се предвреме родени, покажало најново истражување објавено во списанието Current Biology , а кое било спроведено на 125 бебиња од детската болница во Колумбус.
Научниците дошле до заклучок дека прегратката поттикнува посебна реакција во бебешкиот мозок, неопходна за воспоставување на социјални и емоционални односи, како и за правовремен развој не нервниот систем.
Со оглед дека визуелниот систем на новороденчињата се уште не е доволно развиен, нивниот развој во голема мера зависи од допир и звук.
За да видат како новороденчињата реагираат на допир, истражувачите го набљудувале нивниот мозок. Колку бебето имало повеќе допири и галење со своите родители и блиски луѓе, толку реакциите во мозокот биле поизразени.
“Нежниот допир, особено оној кожа на кожа, е само еден од важните работи кои родителите може да ги направат за своите бебиња“, истакнала д-р Натали Маитре, еден од истражувачите.
