Сезоната на настинки и грип сè уште трае, а со неа и непријатната кашлица која може долго да се задржи. Се поставува прашањето – кога кашлицата е само минлив проблем, а кога е знак дека е време за посета на лекар. Стручњаците истакнуваат дека одговорот лежи во траењето и придружните симптоми, пишува The Independent.
Лекарска помош би требало да се побара ако кашлицата потрае подолго од една или две недели. „Посебно нè загрижува кашлицата која се влошува, ако е придружена со температура или предизвикува тешкотии со дишењето“, вели д-р Лорас Евен од UnityPoint Health. „Пациентите со такви симптоми би требало да се јават на преглед.“
Што ја предизвикува кашлицата?
Кашлицата е природен рефлекс со кој дишните патишта се чистат од иританти и се штитат белите дробови. Најчесто ја поттикнува чувството на скокоткање или гребење во грлото, што обично е последица на вирусна инфекција, воспаление, алергија, загаден воздух, слевање на секрет од носот, желудочен рефлукс или сувост на грлото.
Меѓутоа, понекогаш кашлицата може да укажува и на нешто посериозно. Според клиниката Мајо, долготрајната кашлица може да биде симптом на срцева слабост, хронична опструктивна белодробна болест (ХОББ), рак на белите дробови, лузни на белите дробови или цистична фиброза. Исто така, може да биде предизвикана од храна или страно тело заглавено во белите дробови.
Акутна и хронична кашлица
Кашлицата која трае пократко од три недели се смета за акутна и најчесто поминува сама по себе. Според Американското здружение за белодробни заболувања, лекарска помош не е потребна освен ако не ја придружуваат други симптоми како температура, главоболка, поспаност или недостаток на воздух.
Посетете лекар ако кашлицата трае подолго од седум до десет дена, ако искашлувате крв, чувствувате недостаток на воздух, болка во градите, имате температура која не попушта со лекови или забележите необјасниво губење на тежината
Од друга страна, хроничната кашлица кај возрасните може да трае осум недели или подолго. „Хроничната кашлица трае повеќе од осум недели и може да биде знак за посериозна или хронична белодробна болест“, наведуваат од Здружението.
Кога да побарате лекарска помош
Начинот на кој кашлицата звучи исто така може да укажува на проблем. Звуците како свирење во градите или лаеж на куче можат да сигнализираат инфекција или затнување на дишните патишта. На пример, големата кашлица може да доведе до воспаление на белите дробови и да има смртоносни последици.
Итна медицинска помош потребно е да побарате ако искашлувате зелен, жолт или крвав секрет, чувствувате остра и трајна болка во градите, повраќате, имате проблеми со дишењето, нагло губите тежина, имате температура која трае подолго од ден-два или чувствувате како да се гушите.
Клиниката Мајо напоменува дека зачестеното кашлање може да доведе и до вртоглавица, потење, скршени ребра, несвестица, како и ненамерно губење на контролата над мочниот меур. „Секако посетете лекар ако кашлицата трае подолго од седум до десет дена, ако искашлувате крв, чувствувате недостаток на воздух, болка во градите, имате температура која не попушта со лекови или забележите необјасниво губење на тежината“, порача за USA Today д-р Кристал Грин, лекар по семејна медицина.
