Спиењето е многу важно за развојот на децата, но сите знаеме дека понекогаш малите не сакаат да спијат, како да им се инаетат на родителите. Постојат неколку трикови кои можат да ви помогнат да ги смирите децата навечер, за полесно и побрзо да заспијат, но освен тоа, треба да знаете и колку часа треба да спијат децата во однос на нивната возраст.
Недостатокот на сон лошо влијае на учењето, вниманието, меморијата, но и на координацијата око-рака, грубата и фината моторика, однесувањето… Исто така, експертите велат дека е поврзан со побавен метаболизам, поголем ризик од инфекции и болести, како и со потешкотии во регулирањето на емоциите.
Потребите за спиење на децата се менуваат како што растат, па родителите често се збунети околу тоа колку сон му треба на детето на одредена возраст – еве го одговорот.
- Новороденче до третиот месец од животот
Во првите месеци од животот новороденчињата поголемиот дел од денот го поминуваат во спиење. Нивните циклуси на спиење се кратки, па изгледа како постојано се будат и заспиваат, но тоа е нормално. Тогаш бебињата се развиваат многу брзо и им треба сон за телото да може да го следи овој брз развој.
Со оглед на тоа што спијат поголем дел од денот во текот на 24 часа, се уште немаат одредено време кога би било добро да заспијат или да се разбудат.
- Бебиња од четири до 12 месеци
Според Американската академија за медицина на сон, бебињата на оваа возраст треба да спијат од 12 до 16 часа во текот на денот, вклучувајќи ноќен сон и дневни дремки. Не постои правило, но најчесто спијат подолго во текот на ноќта и два до три пати во текот на денот.
- Дете од една до две години
На оваа возраст, се препорачува детето да спие од 11 до 14 часа во текот на 24 часа, вклучувајќи ги и дневните дремки. Можно е детето во оваа фаза на растење да прескокне една дневна дремка, па сега ќе спие еднаш или двапати попладне.
- Дете од три до пет години
Потребите за сон не се менуваат значително во оваа возрасна група, па на малите сега им требаат од 10 до 13 часа сон. Повеќето деца на возраст од пет години го прескокнуваат дневниот сон.
- Деца од шест до 12 години
Овие деца треба да спијат помеѓу девет и 12 часа во текот на ноќта, а бидејќи веќе одат на училиште, ќе забележите дека не спијат доволно ако е многу тешко да се разбудат наутро за училиште или други активности.
Најдобро е да го одредите времето за легнување во однос на тоа во колку часот наутро детето треба да стане.
- Деца од 13 до 18 години
Се препорачува тинејџерите да спијат од осум до десет часа навечер. Експертите велат дека современите технологии го нарушуваат сонот на децата бидејќи тинејџерите често остануваат будни до доцна со телефони и компјутери, што може да се забележи по проблеми со вниманието, проблеми во комуникацијата и регулирање на емоциите – сето тоа се знаци дека не спиеле доволно.
Може ли детето да спие премногу?
Иако е поретко децата да спијат многу отколку да спијат малку, можно е да спијат премногу. Таквите деца имаат проблеми со заспивањето навечер, тешко се будат рано наутро и често се будат во текот на ноќта. Главен виновник за тоа се дневните дремки кои во оваа подоцнежна возраст не им требаат, туку им пречат во ноќниот сон.
