Не обрнувате внимание на тоа колку вашето дете спие или забележувате дека е постојано уморно, ова е причина повеќе да почнете да го следите неговиот ритам. Спиењето помеѓу седум и девет часа секоја вечер е клучно за одржување на добро здравје, покажуваат бројни студии. А сега експертите веруваат дека децата, односно тинејџерите кои не спијат доволно, се изложени на поголем ризик од мултипла склероза.
Имено, група научници од Шведска откриле дека млади кои спијат помалку од седум часа во текот на ноќта имаат и до 40 отсто поголеми шанси да развијат мултипла склероза во текот на животот од оние кои спијат повеќе часови. Недостатокот на сон може да предизвика сериозни здравствени последици за децата, вклучувајќи хронична болка и замор, како и проблеми со рамнотежа и концентрација.
Истражувачите ги анализирале моделите на спиење на повеќе од 5.000 возрасни лица за време на нивните тинејџерски години, некои од нив имале мултипла склероза, додека други не. Испитаниците кои спиеле помалку од седум часа секоја вечер во просек имале 40 отсто поголем ризик подоцна да развијат мултипла склероза. Според експертите, на тинејџерите им требаат минимум девет часа сон.
Мултипла склероза (МС) е сериозна автоимуна, воспалителна и невродегенеративна болест на мозокот, ‘рбетниот мозок и оптичкиот нерв.
Најчестите симптоми се:
- губење на видот,
- трнење,
- мускулна слабост,
- несигурно одење,
- двојни слики
- нарушувања во мокрењето
Повеќе од половина од пациентите имаат когнитивни пречки веќе по неколку години. Овие симптоми се придружени со замор и депресија, што се заедно има многу негативно влијание врз квалитетот на животот на овие млади луѓе. Кај пациент на возраст под 12 години, тешко е да се дијагностицира и разликува МС од други невролошки заболувања.
