Летните месеци се пред нас, горештините веќе започнаа и повторно се поставува прашањето смееме ли барем на една минута да го оставиме детето само во автомобил. Родителите најчесто тоа го прават кога плаќаат гориво на бензински пумпи или кога одат во продавница да купат нешто ситно.
Експертите апелираат никогаш да не оставате дете без надзор во автомобил, бидејќи температурата во него може да се загрее до опасни вредности дури и во постудени денови. Имено, за само 5 минути температурата во автомобилот може да се удвои. Исто така, постои опасност детето да го заклучи автомобилот одвнатре, па нема да можете да стигнете до него.
Зошто е опасно да оставите дете само во автомобил?
Топлотен удар, срцев удар, дехидрација, гушење и смрт се главните ризици за оставање на децата во автомобил.
Бидејќи децата имаат побрз метаболизам од возрасните, нивната телесна температура се зголемува три до пет пати побрзо во загреана средина. Ако детето е заклучено во автомобил, во кој во летните месеци температурата достигнува 50 степени, топлотниот удар е неизбежен, а во организмот на малото дете може да дојде до смрт за само 15 минути.
Кои се симптоми на топлотен удар?
Во почетокот почнуваат симптоми како замор, вртоглавица, кожата е топла, сува и црвена, детето повеќе не може да се поти, пулсот се зголемува, се јавува тахикардија, детето почнува да дише забрзано, температурата му се зголемува. По губењето на свеста, детето умира поради трајно оштетување прво на мозокот, а потоа на другите внатрешни органи.
Што да направите ако вашето дете е некое време само во автомобил, а надвор температурите се високи?
- Ако вашето малечко е случајно заклучено или ако видите туѓо дете без надзор во автомобилот, можете да повикате помош на пат или полиција.
- Ако детето изгледа прегреано, изгледа вознемирено или се чини дека е долго заклучено во автомобилот, јавете се на итна помош
- Додека не пристигне брзата помош во случај на дехидрација, дајте му на детето течности
- Ако детето е прегреано, отстранете ги дополнителните слоеви облека од него, изладете го со марамче натопено во вода доколку ги имате во близина.
- Ако детето е во несвест и не дише нормално, веднаш започнете со процедурата за реанимација.
Како да се спречат вакви ситуации?
- Никогаш не оставајте дете без надзор во автомобилот, дури и за една минута
- Никогаш не дозволувајте детето да си игра со вашите клучеви
- Секогаш држете го автомобилот заклучен кога не сте во него за вашето малечко да не влезе само во него
- Разговарајте со вашето дете да не си игра со копчињата во автомобилот
- Ако не можете да го најдете вашето дете, секогаш проверувајте дали не се сокрило во автомобилот.
