Мозокот на новороденчето е вистинско чудо, а ние ви пренесуваме неколку факти за оваа “машинка“ кои ќе ве изненадат.
Прво психомоторика и сетила
Во првите денови од животот на бебето, во мозокот се развиваат центри кои управуваат со психомоториката и сетилата. Мајката природа не случајно ги поставила овие приоритети. Имено, за да може бебето да преживее, потребно е бебето брзо да го совлада препознавањето на сетилата и да управува со сопствените органи, односно неговиот малечок мозок да научи да испраќа информации за примарните потреби на неговото тело, како на пр. како глад, жед, замор, дури и болка или каква било непријатност.
Интересно е што во овој сегмент на развој и раст, мозокот на момчињата има тенденција да расте побрзо од мозокот на девојчињата, а во првите денови по раѓањето мозокот на бебето расте и се развива со неверојатна брзина.
Што е со емоционалниот развој?
Така, кога ќе дојдат на свет, бебињата дејствуваат исклучиво според инстинктот и рефлексите. Мајките сакаат да мислат дека нивните малечки ги разбираат, дури и се обидуваат да ги шармираат и да го привлечат нивното внимание. Но, новороденчињата не се способни да ги разберат емоциите, според научниците. Кога ќе дојдат на свет, нивниот емотивен развој само што почнува.
Ако се гладни, имаат влажна пелена, се поспани или сакаат да бидат блиску до мајка си, вниманието го привлекуваат на единствениот начин на кој знаат – со плачење.
Во почетокот тие треба да ги задоволуваат само највиталните потреби и да одговорат на инстинктот на самоодржување. Сепак, од многу рана возраст, бебињата ја активираат својата ненадмината способност за собирање информации и преку овој процес нивниот мозок постепено созрева.
Но, тоа не значи дека родителите не треба да ги изразуваат своите емоции на бебето. Напротив, како што на нивните мали тела им е потребна храна за да расте, така и на нивните мозоци им е потребна емоционална стимулација за да се развива. Затоа, експертите сметаат дека когнитивниот развој на детето целосно зависи од средината во која расте и емоционалните дразби што ги добива. Гушкањето, пеењето или разговорот со вашето бебе, бакнежите и доењето се одлични начини да ги стимулирате трансформациите што се случуваат во мозокот на вашето бебе и да и помогнете да го разбере светот околу себе.
Во текот на првите 3 месеци од животот, мозокот на бебето физички се развива со неверојатна брзина, но се развиваат и неговите когнитивни способности.
При раѓањето, мозокот на бебето се состои од милиони неврони на кои им е потребна стимулација за да воспостават врски и да формираат невронски мрежи. Ова ќе им овозможи да ги завршат задачите и да функционираат како емотивни и рационални човечки суштества во иднина.
Љубов и внимание – најдобра стимулација
При раѓањето, човечкиот мозок е слабо развиен, а вистинскиот развој се случува надвор од матката, поради изложеноста на стимули од околината, за што исто така е потребно време. Семејната и родителската грижа и љубовта придонесуваат за развојот на мозокот на детето. Затоа, задоволете ги потребите на вашето дете и направете го среќно.
